Բոլոր այն մարդիկ, որոնք ասում են, որ կորոնավիրուս չկա կամ այն անվտանգ է, նույնն է, թե ասեն, որ Ապրիլյան պատերազմում հարձակվող ադրբեջանական զինվորն անվտանգ է, կամ ադրբեջանական դրոնը, հրթիռը անվտանգ է: Այս մասին պարետատան նիստից հետո կայացած ճեպազրույցին հայտարարեց «Անտարես» հրատարակչության տնօրեն Արմեն Մարտիրոսյանը, ում հայրը՝ Աքիլես Մարտիրոսյանը, մահացել է կորոնավիրուսից:
Նա հայտնեց, թե վերջին շաբաթներին կորոնավիրուսով վարակվել են իր ընտանիքի գրեթե բոլոր անդամնեը: Ինքը, թեև շուրջ 4.5 ամիս չի շփվել ծնողների հետ, սակայն չի կարողացել ապահովել, որ այլ անձինք ևս չշփվեն, և դա բերել է նրան, որ վարակվել են ընտանիքի անդամները:
«Իմ օրինակը ևս մեկ անգամ փաստում է, որ անգամ եթե մենք անձամբ պահպանում ենք սահմանված կանոնները, դրանով դեռ չենք լուծում խնդիրը, քանի դեռ հանդուրժում ենք այն մարդկանց, որոնք կանոնները չեն պահպանում: Սիրելի հայրենակիցներ, մի՛ կրկնեք իմ սխալը, թույլ մի՛ տվեք, որ ձեր հարազատները առանց հեռավորությունը պահպանելու, առանց դիմակ կրելու և առանց ձեռքերը պարբերաբար ախտահանելու շփվեն իրար հետ»,-ասաց Արմեն Մարտիրոսյանը։