Երաշխավորված չէ, որ գիտնականները կարող են մշակել COVID-19-ի դեմ արդյունավետ պատվաստանյութ։ BBC-ի հաղորդմամբ՝ այս մասին հայտարարել է Առողջապահության համաշխարհային կազմակերպության ղեկավարը։
Թեդրոս Ադհանոմ Գեբրեյեսուսը ԵՄ խորհրդարանի առողջապահության հանձնաժողովին ասել է, որ նույնիսկ եթե պատվաստանյութ մշակվի, ապա այն, ամենայն հավանականությամբ, հասանելի չի լինի առնվազն մեկ տարի։
«Դժվար է հստակ ասել, որ մենք պատվաստանյութ կունենանք։ Մենք երբեք կորոնավիրուսի դեմ պատվաստանյութ չենք ունեցել։ Եթե պատվաստանյութ հայտնաբերվի, հույս ունենանք, որ այն կհայտնաբերվի, ապա այն կլինի առաջինը»,- ասել է Գեբրեյեսուսը ԵՄ օրենսդիրներին։
Պատվաստանյութերը մարդու իմունային համակարգին օգնում են ճանաչել պաթոգենները և պայքարել դրանց դեմ։ Դրանք համարվում են COVID-19-ի նման հիվանդությունների տարածումը կանխելու ամենաարդյունավետ միջոցներից մեկը:
Աշխարհում այժմ փորձարկվում է նոր տեսակի կորոնավիրուսի դեմ ավելի քան 100 հնարավոր պատվաստանյութ։
