Դեղամիջոցների եվրոպական գործակալությունը հավանություն է տվել «Ռեմդեսիվիրին» որպես առաջին դեղամիջոց, որը կարող է օգտագործվել կորոնավիրուսի առաջացրած ինֆեկցիոն հիվանդության բուժման համար: Այս մասին այսօր հայտնել է Նիդեռլանդների Դեղամիջոցների գնահատման հանձնաժողովը, փոխանցում է ՏԱՍՍ-ը:
Կազմակերպության տեղեկություններով՝ գրանցումը տրամադրվել է մեկ տարով՝ պայմանով, որ արտադրողը դեկտեմբերից ոչ ուշ ներկայացնելու է լրացուցիչ հետազոտությունների արդյունքները եւ տեղեկություններ արտադրության գործընթացի մասին:
«Եվրահանձնաժողովի հավանությունը ստանալուց հետո ԵՄ-ում բժիշկները կարող են դեղամիջոցը նշանակել կորոնավիրուսով պացիենտներին, որոնք հոսպիտալացվել են թոքաբորբով եւ թթվածնի լրացուցիչ կարիք ունեն,- նշել են հանձնաժողովից: — Այդպիսի պացիենտները ռեմդեսիվիր ընդունելու դեպքում առողջանում են միջինը 4 օր ավելի արագ»:
Հոլանդացի մասնագետներն ակնկալում են, որ Եվրահանձնաժողովը դեղամիջոցին հավանություն կտա արդեն հաջորդ շաբաթ: