Մեքսիկան կորոնավիրուսի հետևանքով մահերի ցուցանիշով գերազանցել է Բրազիլիային

Մեքսիկան կորոնավիրուսի հետևանքով մահվան դեպքերի օրական ցուցանիշով գերազանցել է Բրազիլիային և ԱՄՆ-ին և աշխարհում առաջին տեղը զբաղեցրել․ նախօրեին այս երկրում կորոնավիրուսից մահացել է 1044 մարդ, այս մասին հայտնում է eadaily.com-ը՝ հղում տալով Worldometers.info կայքի տեղեկություններին։ Մեկ օրում գրանցված մահվան դեպքերի թվով երկրորդ տեղում է հայտնվել Բրազիլիան (748), այնուհետև՝ ԱՄՆ-ն (363)։ Իսկ ամբողջ աշխարհում հունիսի 22-ին կորոնավիրուսից մահացել է 3 880 մարդ։

Համավարակի հետևանքով ընդհանուր մահացել է ավելի քան 473 000 մարդ․ այս ցուցանիշով աշխարհում առաջատար եռյակ են համարվոմ ԱՄՆ-ն (122 հազար մարդ), Բրազիլիան (51 հազար ) և Մեծ Բրիտանիան (42 հազար)։

Աշխարհում ընդհանուր գրանցվել է կորոնավիրուսով վարակման 9,2 միլիոն դեպք, ապաքինվել է 5 միլիոն մարդ։ Վարակակիրների թվի աճի պիկը գրանցվել է հունիսի 19-ին՝ 181 000, իսկ մահվան դեպքերի պիկը գրանցվել է ապրիլի 17-ին՝ 8,4 հազար օրական։

Վարակակիրների թվով ԱՄՆ, Բրազիլիա, Ռուսաստան եռյակին հաջորդում են Հնդկաստանը, Մեծ Բրիտանիան, Իսպանիան, Պերուն, Չիլին, Իտալիան, Իրանը։