ԱՄՆ-ի նահանգների կեսից ավելին հայտնել են կորոնավիրուսի նոր դեպքերի աճի մասին, հաղորդում է CNN-ը։ Արիզոնայում վերջին 14 օրվա ընթացքում կորոնավիրուսի դեպքերը գրեթե կրկնապատկվել են։ Հունիսի 7-ին Արիզոնայում եղել է 26.989 դեպք, իսկ հունիսի 21-ին այդ թիվը հասել է 52.390-ի։
Լրատվամիջոցը նաև հաղորդում է, որ Միացյալ Նահանգների հարավում իշխանությունները նախազգուշացնում են երիտասարդ վարակակիրների թվի ավելացման մասին։ Հյուսիսային Կարոլինայում նոր դեպքեր են արձանագրվում հիմնականում 25-49 տարեկանների շրջանում, Տեխասում և Ֆլորիդայում նոր հիվանդացածների մեծամասնությունը կազմում են 30 տարեկանից ցածր անձինք։
ԱՄՆ Ալերգիաների և ինֆեկցիոն հիվանդությունների ազգային ինստիտուտի տնօրեն Էնթոնի Ֆաուչին հայտնել է, որ այս միտումը զարմանալի չէ, քանի որ երիտասարդներն ավելի շատ են «վտանգավոր վարք ցուցաբերում»։
Ջոն Հոփկինսի համալսարանի վերջին տվյալների համաձայն՝ ԱՄՆ-ում մինչև օրս կորոնավիրուսով հիվանդացել է ավելի քան 2.357.323 մարդ, որոնցից 980.367-ն ապաքինվել է, 122.259-ը` մահացել։
