Medmedia.am-ի տեղեկություններով հունիսի 10-ին «Աստղիկ» բժշկական կենտրոնում ծննդկան է մահացել։ Վերջինիս քույրը՝ Հասմիկը պատմեց, որ քույրը հղիության ընթացքում առողջական վիճակից չի բողոքել, իրեն լավ է զգացել։ Սակայն կեսարյան հատումից հետո նրա մոտ ի հայտ են եկել մի շարք խնդիրներ․ ծանր թոքաբորբ, սեպսիս և բազմաթիվ այլ ախտանշաններ։
«Քույրս 35 շաբաթական հղիությամբ ապրիլի 29-ին տեղափոխվել է «Շենգավիթ» բժշկական կենտրոն, քանի որ այդ օրը վատ է զգացել իրեն։ Հիվանդանոցում մեզ է մոտենում Սաթենիկի բժիշկը՝ մանկաբարձ-գինեկոլոգ Արաքս Ռուդոլֆի Հակոբյանը և տեղեկացնում է, որ քրոջս վիճակը վատթարացել է ու անհապաղ պետք է կեսարյան հատում արվի։ Վիրահատությունից հետո մեզ տեղեկացնում են, որ նա կոմայի մեջ է, նրա մոտ երիկամների անբավարարություն ու թոքերի այտուց է սկսվել, բացի դրանից՝ նաև ախտորոշվել է մոր և երեխայի անհամատեղելիություն։ Սակայն ես տարբեր բժիշկների հետ զրուցել եմ, նրանք ինձ ասել են, որ այդ խնդիրը նկատելի պետք է լիներ դեռ նախորդ հետազոտությունների ընթացքում»,-մեզ հետ զրույցում պատմեց Հասմիկը։ Այնուհետև , բժիշկներն իրենց տեղեկացրել են, որ Սաթենիկի մոտ սեպսիս է և ցավոք՝ օրգանները չեն աշխատում։ Բժիշկների հորդորով Սաթենիկին մայիսի 1-ին տեղափոխել են «Աստղիկ» ԲԿ, որտեղ ևս ախտորոշվել է սեպսիս։ Հասմիկը մեզ պատմեց, որ որոշ ժամանակ անց իր քրոջ մոտ դրական փոփոխություններ են նկատվել, սակայն արգանդում առաջացած խնդիրների պատճառով՝ ընդհանուր անզգայացմամբ՝ վերջինիս արգանդը հեռացրել են։ « Թվում էր՝ քույրս լավ է, բայց նորից ու նորից ինչ որ խնդիրներ առաջացան ու Սաթենիկը չէր կարողանում ոտքերը և թևերը շարժել։ Սկսեցինք նրան այս ուղղությամբ բուժել, մտածում էինք՝ գոնե կյանքը փրկվի։ Բայց արի ու տես, որ քրողջս տանջանքները այսքանով չէին ավարտվելու։ Նրա կեսարյան հատման կարերը սկսեցին բորբոքվել։ Հունիս 5-ին քրոջս մոտ արյունահոսություն սկսվեց, արգանդի անոթներն էր վնասված։ Նրան կրկին վիրահատեցին, արյունահոսությունն անցավ, բայց թոքերի աշխատանքը կտրուկ վատացավ, որի հետևանքով էլ հունիսի 10-ին նա մահացավ»,-պատմեց Հասմիկը։ Medmedia.am-ը կապ հաստատեց «Շենգավիթ» բժշկական կենտրոնի բժշկուհի մանկաբարձ-գինեկոլոգ Արաքս Ռուդոլֆի Հակոբյանի հետ։ Նա մեզ հետ զրույցում նշեց, որ մամուլում իրականությունը խեղաթյուրված են ներկայացնում և նա , որպես բժիշկ ընթացքի վերաբերյալ Սաթենիկի հարազատներին մշտապես տեղյակ է պահել ու նրա կյանքը փրկելու համար արվել է հնարավոր ամեն բան։
Իսկ ԲԿ-ի մարքեթինգի և հանրային կապերի կոորդինատոր Անուշ Բադալյանը մեզ հետ զրույցում նշեց, որ բժշկական էքսպերտիզայի արդյունքները ստանալուց հետո միայն իրենք հանդես կգան համապատասխան հայտարարությամբ։
Սյուզի Ասատրյան
