Ամառային ջերմ ու արևոտ օրերն այլևս իրականություն են: Պարզվում է այս շրջանում բավական խոցելի են մեր աչքերը, MedMedia.am-ը ամռանն աչքերին սպառնացող խնդիրների մասին զրուցել է Վ. Ավագյանի անվան ԲԿ-ի աչքի էքսիմեր լազերային վիրաբուժության բաժանմունքի վարիչ և Ս.Վ. Մալայանի անվան ակնաբուժական կենտրոնի լազերային և նորագույն տեխնոլոգիաների բաժանմունքի բժիշկ-ակնաբույժ, միկրովիրաբույժ Լուսինե Բեկիրսկա-Թամազյանի հետ: «Ամռան ամիսներին ակտիվանում են ալերգիկ ռեակցիաները, ինչը պայմանավորված է նաև հայկական լեռնաշխարհի բարձրադիր լինելու հետ»,-ասաց ակնաբույժը:
Բժշկուհու փաստմամբ՝ ամռան ամիսներին հատկապես երեխաների մոտ աչքի բորբոքումների առաջացմանը նպաստում են լողավազանները: «Ամռանը տարածված երևույթ է նաև «չոր աչքի» ախտանիշը, որը համարվում է քաղաքակրթության հիվանդություն. այն առաջանում է համակարգչի դիմաց և օդորակիչների միջավայրում երկար ժամանակ անցկացնելուց»,-ասաց Լուսինե Բեկիրսկա-Թամազյանն ու շարունակեց. ««Չոր աչքի» դեպքում մարդ ունենում է աչքում օտար մարմնի և չորության զգացողություն, անհանգստություն: Այդ դեպքում մենք նշանակում ենք խոնավեցնող կաթիլներ»:
Ակնաբույժը կանանց հորդորեց ամռան ամիսներին շպարվելիս խուսափել կոսմետիկ միջոցների չարաշահումից, և հետևել հիգիենայի կանոնենրին` քնելուց առաջ լվանալ աչքերը:
Առհասարակ, բժշկուհին խորհուրդ տվեց պարտադիր կրել ուլտարմանուշակագույն ճառագայթներից պաշտպանող որակյալ, ցանկալի է մուգ կանաչ, շականակագույն կամ սև ապակիներով ակնոց և գլխարկ: