«Եթե մտածված արվի բացումը, այսինքն՝ հերթականությամբ, տնտեսության ամեն ճյուղ նախապես պատրաստվի բացվելուն, ներդրվեն անվտանգության ապահովման նոր սանիտարական կանոններ, ինչ խոսք, այդ ռիսկերը կհասցվեն մինիմալի։ Մասնագետները՝ ի դեմս ԱՀԿ-ի, նշում են, որ չմտածված, հապճեպ, անպատրաստ բացումը կարող է հանգեցնել շատ ավելի ծանր սոցիալ ու տնտեսական հետևանքների, քան կարանտինային ռեժիմի սահմանափակումները»,- այս մասին ասել է անրային առողջության մասնագետ Դավիթ Մելիք-Նուբարյանը:
Ըստ նրա՝ կարանտինն առանց լուրջ նախապատրաստական աշխատանքների թուլացնելն իսկապես մտահոգիչ հետևանքներ կարող է ունենալ: Վերջինս ամենապարզ սցենարն է ներկայացնում․ օրինակ՝ սննդի օբյեկտներում կրճատել սեղան-աթոռների կամ մեկ սեղանի շուրջ նստողների թիվը։
Փորձագետն անդրադարձել է նաև պարետ Տիգրան Ավինյանը հայտարարությանը, որ եթե կարանտինի մեղմացումը վտանգավոր հետևանքների բերի, վերադարձ կլինի ավելի կոշտ ռեժիմի։
Դավիթ Մելիք-Նուբարյանի կարծիքով՝ ամեն ինչ բացել, հետո նորից փակելը հանրության սրտով չի լինի։
Կարանտինային ռեժիմի թուլացման գաղափարի հետ համամիտ է համաճարակաբան Արման Բադալյանը։ Ասում է՝ այս մոտեցումն այժմ ամբողջ աշխարհում է կիրառվում։ Կորոնավիրուսի դեմ պայքարում համաճարակաբանը կարևորում է կոլեկտիվ իմունիտետը։ Բադալյանն ընդգծեց, որ քանի դեռ պատվաստանյութ չի հայտնաբերվել, սա ամենաարդյունավետ միջոցներից է։
Աղբյուր՝ factor.am