Եվրամիությունն ընդհանուր առմամբ ավելի քան 20 միլիարդ եվրո կհատկացնի՝ գործընկեր-երկրներին կորոնավիրուսային պանդեմիայի դեմ պայքարում աջակցելու համար: Այս մասին ապրիլի 8-ին եվրոպական զարգացման հարցերով նախարարների հետ անցկացրած տեսակապից հետո ասել է ԵՄ արտաքին գործերի և անվտանգության հարցերով գերագույն ներկայացուցիչ Ժոզեպ Բորելը, հայտնում է DW-ն:
«Վիրուսը դեռ չի պարտվել, քանի դեռ այն չի հաղթահարվել ամենուր», – շեշտել է Բորելը:
Team Europe փաթեթով ԵՄ իշխանությունները մտադիր են աջակցել «առավել խոցելի երկրներին», որոնք գտնվում են մասնավորապես Աֆրիկայում, Ասիայում, Լատինական Ամերիկայում, ինչպես նաև Արևելյան գործընկերության տարածքում և Բալկաններում:
Գումարները կուղղվեն մարդասիրական օգնությանը, առողջապահական համակարգերի ամրապնդմանը, ջրամատակարարմանը և սանիտարական միջոցառումներին, ինչպես նաև համաճարակի սոցիալական և տնտեսական հետևանքները մեղմելուն:
20 միլիարդ եվրոն ստացվել է Եվրոպական հանձնաժողովի, ԵՄ անդամ երկրների, ինչպես նաև Եվրոպական ներդրումային բանկի և Վերակառուցման և զարգացման եվրոպական բանկի ռեսուրսներից:
