Սիբիրի պետական բժշկական համալսարանի գիտնականներն ուսումնասիրել են դիաբետի ազդեցությունը ուղեղի ճանաչողական ֆունկցիաների վրա՝ օգտագործելով մագնիսա-ռեզոնանսային տոմոգրաֆը: Նրանց խոսքով, տեխնիկան ցույց է տվել իր արդյունավետությունը և այսօր արդեն կարող է ներդրվել կլինիկական պրակտիկայում։ Հետազոտության արդյունքները հրապարակված են Neuroscience and Behavioral Physiology ամսագրում։
Սիբիրի պետական բժշկական համալսարանի գիտնականներն իրենց հետազոտության համար օգտագործել են «տրակտոգրաֆիա»՝ մագնիսական ռեզոնանսային տոմոգրաֆիայի միջոցով ուղեղի նյարդային ուղիներն ուսումնասիրելու ոչ ինվազիվ մեթոդը: Նրանց կարծիքով՝ այս մեթոդը բժիշկներին կօգնի հստակ պատկերացում կազմել հիվանդների ուղեղի տարբեր հատվածների վիճակի մասին և ժամանակին հետևել դրանցում տեղի ունեցող փոփոխություններին։
Հետազոտողները պարզել են, որ տրակտոգրաֆիան կարող է արդյունավետ կերպով դիտարկել այն փոփոխությունները, որոնք տեղի են ունենում տարբեր տեսակի շաքարախտով հիվանդների մոտ հիվանդության զարգացման ընթացքում, և այս մեթոդն այսօր արդեն հասանելի է ընդհանուր բժշկական պրակտիկայում: «Մենք պարզեցինք, որ շաքարի և խոլեստերինի մակարդակի փոփոխությունները ազդում են ուղեղի ամբողջականության վրա: 1-ին տիպի շաքարախտի դեպքում վատթարացնող հանգամանքը բարդությունների առկայությունն է, իսկ 2-րդ տիպի շաքարախտի դեպքում՝ հիվանդի տարիքը»,- ասել է պրոֆեսոր, Սիբիրի պետական բժշկական համալսարանի Կլինիկական հետազոտությունների կենտրոնի տնօրեն Յուլիա Սամոիլովան:
Գիտնականները նշում են, որ ներկայումս առաջարկվող մեթոդի անալոգներ չկան. անհնար է գնահատել ուղեղի նուրբ կառուցվածքը այլ մեթոդների միջոցով: Ախտորոշումը տրակտոգրաֆիայի միջոցով չի պահանջում բարձր ծախսեր, այն պահանջում է միայն ՄՌՏ ապարատ:
