Ինչպես գիտենք հանրային վայրեր մուտք գործելու համար անհրաժեշտ է ներկայացնել կորոնավիրուսային հիվանդության դեմ պատվաստվան կամ թեստավորման QR կոդերը։ Բազմիցս խոսվել է այն մասին, որ QR կոդերը չսկանավորելու դեպքում ֆոտոշոփի տարրական գիտելիքներ ունեցող անձն էլ կարող է այն կեղծել, ինչպես նաև շատ դեպքերում վարակված, սակայն չթեստավորված անձինք իրենց կանաչ QR կոդերով հանգիստ կարողանում են օգտվել բոլոր հանրային վայրերից, որտեղ գործում է տվյալ սահմանափակումը։
Սակայն, ինչպես հասցրել ենք նկատել, շատ ու շատ վայրեր դադարել են պահանջել այդ QR կոդերը, և քաղաքացիների համար ապահովում են ազատ ելումուտ։ Ինչ վերաբերում է գրադարաններին, այնտեղ ևս գործում է սահմանափակումը, սակայն օրերս ֆեյսբուքյան օգտատերերից մեկը հրապարակավ հայտնեց դժգոհությունը՝ ասելով, որ բոլոր հնարավոր և անհնարին վայրերում ազատ ելումուտ է, հենց հերթը հասնում է գիրք կարդալուն, կամ աշխատելուն՝ QR կոդ են ուզում։
Մեկնաբանություններում ևս այլ օգտատերերը հայտնում էին նույն կարծիքը, որ բոլոր վայրերում այլևս չի պահանջվում QR կոդեր, իսկ գրանադարնում դեռևս գործում է խիստ սահմանափակումը։ Ուստի, հանուն արդարության պետք է ասել, որ այո՛, շատ վայրեր ուղղակիորեն անտեսում են այս սահմանափակումը, իսկ վերահսկողության մասին խոսելն ուղղակի ավելորդ է, ինչը գրադարանների դեպքում կարծես այնքան էլ այնպես չէ։
Օֆելյա Պողոսյան
