Վրաստանում կորոնավիրուսի տարածման կանխարգելման միջոցառումների շրջանակներում, միջգերատեսչական համակարգող խորհրդի հերթական նիստում, վարչապետ Գիորգի Գախարիայի գլխավորությամբ ընդունվել են նոր որոշումներ: Մինչ այդ նշվել է, որ այսօրվա դրությամբ վարակված է 33 մարդ: Նրանց մեծամասնության առողջական վիճակը բավարար է: Այս փուլում կարանտինում կա 637 մարդ, 54 մարդ վերահսկողության ներքո է:
Կառավարության որոշմամբ` մարտի 18-ից, երկու շաբաթվա ընթացքում, օտարերկրյա քաղաքացիներին թույլ չեն տա մուտք գործել Վրաստան: Միևնույն ժամանակ, ժամանակավորապես փակվում են Վրաստանի լեռնադահուկային հանգստավայրերը:
Համակարգող խորհուրդը հանձնարարականով դիմել է սրճարաններին, ռեստորաններին և բարերին` ժամանակավորապես սահմանափակել քաղաքացիների անմիջական սպասարկումը և գործել միայն այսպես կոչված ՝ առաքման ծառայություններով:
70 տարեկանը անցած քաղաքացիներին խորհուրդ են տվել հնարավորինս խուսափել հասարակական վայրերից և մնալ ինքնամեկուսացման մեջ: