Հարավային Աֆրիկայից ՌԴ ժամանած ՊՇՌ թեստի դրական արդյունքով երկու հիվանդի մոտ հաստատվել է COVID-19-ի «օմիկրոն» շտամը, հայտնել են Ռոսպոտրեբնադզորի մամուլի ծառայությունից։
«Ռոսպոտրեբնադզորի համաճարակաբանության կենտրոնական գիտահետազոտական ինստիտուտի կողմից իրականացված գենոմային սեկվենսավորման արդյունքում մեկուսարաններում գտնվելու առաջին օրը ստացված դրական ՊՇՌ թեստով երկու հիվանդի մոտ հաստատվել է օմիկրոնի շտամը»,-ասվում է հաղորդագրության մեջ։
Սպառողների իրավունքների պաշտպանության և մարդու բարեկեցության վերահսկման դաշնային ծառայությունը ձեռնարկում է բոլոր անհրաժեշտ միջոցները՝ Ռուսաստանի բնակչությանը կորոնավիրուսային վարակի նոր տարբերակից պաշտպանելու համար, հայտնում է մամուլի ծառայությունը։
Հիշեցնենք, որ Առողջապահության համաշխարհային կազմակերպությունն ահազանգում է կորոնավիրուսային հիվանդության հարուցչի նոր ենթատեսակի` «Օմիկրոնի» մասին («B.1.1.529»)` սահմանելով այն որպես անհանգստություն առաջացնող:
Կորոնավիրուսային հիվանդության նոր շտամն ունի շուրջ 50 մուտացիա, որից 30-ը` սպայկային սպիտակուցում, առաջին անգամ արձանագրվել է Հարավային Աֆրիկայի Հանրապետությունում:
Առողջապահության համաշխարհային կազմակերպության տվյալներով՝ նոր շտամի դեպքում ներկայիս պատվաստանյութերը կարող են այդքան էլ արդյունավետ չլինել։
ԱՀԿ-ն նաև հայտնել է, որ այս շտամն ավելի արագ է տարածվում, քան իր նախորդները, ինչի մասին վկայում է Հարավային Աֆրիկայի փորձը:
Հետևաբար, նոր շտամը կարող է վարակել ավելի շատ մարդկանց, ներառյալ նրանց, ովքեր ապաքինվել են այլ շտամներից: Կազմակերպությունը կոչ է արել բոլոր երկրներին ավելի մեծ ուշադրություն դարձնել կորոնավիրուսի նոր շտամի ուսումնասիրությանը։
