Ռուսաստանում ստեղծվել է պատվաստանյութ դեռահասների համար։ Ռուսաստանի Առողջապահության նախարարությունը գրանցել է «Sputnik M» պատվաստանյութը, որը կօգտագործվի 12-ից 17 տարեկան դեռահասների վարակը կանխելու համար ներառյալ։ Այս մասին չորեքշաբթի լրագրողներին հայտնել են նախարարության մամուլի ծառայությունից։
Համաճարակաբանության և մանրէաբանության ազգային գիտահետազոտական կենտրոնի փոխտնօրեն Դենիս Լոգունովը հայտնել է, որ Ռուսաստանում գրանցվել է Sputnik M կորոնավիրուսի դեմ պատվաստանյութ 12-ից 17 տարեկան դեռահասների համար․ հայտնում է ՏԱՍՍ-ը։
«Այսօր թույլտվություն է ստացվել օգտագործել Sputnik-ը մանկական պոպուլյացիայի մեջ, գրանցվել է պատվաստանյութը, մենք կարող ենք կիսել այս ուրախալի փաստը»,- ասել է Լոգունովը։
Բոլոր անհրաժեշտ կլինիկական հետազոտությունների արդյունքների հիման վրա, որոնց ընթացքում Gam-Covid-Vac M-ը ցույց է տվել բարձր անվտանգություն և արդյունավետություն, և դրական փորձագիտական եզրակացության հիման վրա, Ռուսաստանի առողջապահության նախարարությունը որոշել է գրանցել Gam-Covid-Vac-ը։
Պատվաստանյութը բաղկացած է երկու բաղադրիչից, որոնք տրվում են 21 օրվա տարբերությամբ։
Նոր կորոնավիրուսի դեմ Sputnik M դեռահասների պատվաստանյութի գրանցման վկայականը ուժի մեջ է հինգ տարի՝ մինչև 2026 թվականի նոյեմբերի 24-ը։ «Գրանցման ամսաթիվը` 2021 թվականի նոյեմբերի 24: Սպառման ժամկետը` 2026 թվականի նոյեմբերի 24», — նշված է Ռուսաստանի Դաշնության Առողջապահության նախարարության դեղերի գրանցամատյանում:
Առողջապահության նախարարությունը նշել է, որ 12-ից 15 տարեկան դեռահասների պատվաստումը կիրականացվի միայն ծնողների կամ խնամակալների համաձայնությամբ, իսկ 15 տարեկանից բարձր՝ իրենց գրավոր տեղեկացված կամավոր համաձայնությամբ։
Նշենք, որ երեխաների և դեռահասների պատվաստումը տարակարծությունների տեղի էր տվել։ Հատկապես «Moderna» պատվաստանյութի շուրջ խոսակցություններ են պտտվում, թե այն չի թույլատրվում 12+ տարիքի երեխաներին, բայց Հայաստանում թույլատրելի շեմը հենց 12+-ն է։
Ֆինլանդիան, հետևելով հարևան Շվեդիային և Դանիային, ևս սահմանափակեց COVID-19-ի դեմ «Մոդեռնա»-ի պատվաստանյութի օգտագործումը երիտասարդ տղամարդկանց համար։ Դա բացատրվում է սիրտ-անոթային համակարգի վրա հազվագյուտ կողմնակի ազդեցությամբ, միոկարդիտով։ Նշենք, որ միոկարդիտը սրտամկանի բորբոքումն է։
1991 թ-ից հետո ծնված երիտասարդներին «Մոդեռնա»-ի փոխարեն կպատվաստեն «ՊՖայզեր»-ով։
Ս․ Ասատրյան
