Հակահամաճարակային ալյանս նախաձեռնությունը գրել է․
Առողջապահության նախարարի 2021թ․ հոկտեմբեր 8-ի թիվ 78-Ն հրամանով փոփոխություններ են կատարվել ՀՀ ԱՆ 2020թ․ օգոստոսի 4-ի «Հայաստանի Հանրապետությունում կորոնավիրուսային հիվանդության (COVID-19) տարածման կանխարգելման նպատակով կիրառվող ՍԿ N 3.1.2-001-20 սանիտարական կանոնները հաստատելու մասին» թիվ 17-Ն հրամանում։
Փոփոխությունների համաձայն՝ ՊՇՌ հետազոտության բացասական արդյունքը հավաստող առավելագույնը 72 ժամ վաղեմության սերտիֆիկատ չներկայացնողների թվում կերակրող մայրերը դարձյալ չեն նշվել, այնինչ ՀՀ-ում ներկայում կիրառվող և սպասվող գրեթե բոլոր պատվաստանյութերի արտադրողների հրահանգներում կերակրող մայրերը նշված են որպես պատվաստման հակացուցում կամ ազդեցությունը նրանց վրա ուսումնասիրված չէ։
Մեջբերենք կերակրող մայրերին վերաբերող կետերը մի շարք պատվաստանյութերի արտադրողների հրահանգներից․
«Սպուտնիկ V»՝ «Պատվաստանյութը հակացուցված է կրծքով կերակրման ընթացքում»։
«AstraZeneca»՝ «Անհայտ է, թե արդյո՞ք AstraZeneca պատվաստանյութն արտազատվում է մարդու կաթում»:
«Sinovac/CoronaVac»՝ «Անհայտ է, թե արդյո՞ք պատվաստանյութն արտազատվում է մարդու կաթում»:
«Moderna»՝ «Կրծքով կերակրող կանանց համար COVID-19 mRNA պատվաստանյութի անվտանգության տվյալները կամ դրա ազդեցությունը նորածինների վրա բացակայում են»։
«Pfizer-BioNTech»` «Մարդու կաթում արտազատման կամ կաթարտադրության վրա պատվաստանյութի ազդեցության վերաբերյալ տվյալները բացակայում են»։
Հարցեր Ա․Ավանեսյանին ու ԱՆ այլ պաշտոնյաներին․
Ինչու՞ եք դուք համառորեն շրջանցում այս կարևորագույն խումբը և նրանց չեք ներառում պատվաստման համար հակացուցում ունեցողների ցանկում։
Հ.Գ. Եթե կերակրող մայրերը պատվաստվեն և երեխաների մոտ առաջանան մոտակա և/կամ հեռակա առողջական խնդիրներ, դուք կրելու եք դրանց ողջ իրավական և բարոյական պատասխանատվությունը: