«Այժմ մենք բոլորս պարտավոր ենք մեկ մարդու պես սատարել պետական քաղաքականությունը, որպեսզի կարողանանք, այսպես ասած, այս փորձությունը հաղթահարել: Եթե մենք հիմա սկսենք առողջապահական համակարգը քննադատել, իրար վրա ցեխ շպրտել, ապա դրանով որևէ դրական արդյունքի չենք կարող հասնե»,- armdaily-ի եթերում ասել է առողջապահության կազմակերպիչ Գևորգ Գրիգորյանը:
Ըստ նրա` այժմ գլխավոր նպատակը ավելի լայն շրջանակներում տեղեկացնելն է կորոնավիրուսի կանխարգելիչ միջոցառումների մասին, որ կորոնավիրուսով վարակվածների թիվը չավելանա:
«Խուճապ չլինելու համար կորոնավիրուսի մասին տեղեկատվությունը մեկ աղբյուրից պետք է լինի: Դա կարող է լինել Առողջապահության նախարարությունը կամ Կառավարությունը` մամուլի ծառայությունով: Հակառակ դեպքում` հնարավոր է տեղեկատվության ակտիվ հոսք, որի տակից ոչ նախարարությունը կարող է դուրս գալ, ոչ մենք` բժիշկներս »,- ասել է Գևորգ Գրիգորյանը:
Նա նշեց, որ դեռևս պետական համակարգը անում է այն քայլերն, ինչ որ անհրաժեշտ է:
«Կարծում եմ` ոչ միշտ է պետք, որ բնակչությունն զբաղվի այն հարցերով, ինչից չի հասկանում: Երբ ԱՀԿ-ն հայտարարում է արտակարգ դրության մասին, ապա բոլորը պարտավոր են ենթարկվել կանոններին»,- ընդգծել է առողջապահության կազմակերպիչը: