Աշխատանքային շաբաթվա տևողությունը մինչև 55 ժամ և ավելի ավելացնելու դեպքում 35 %-ով կարող է աճել ինսուլտի վտանգը, իսկ սրտի իշեմիկ հիվանդությունից մահվան վտանգը՝ 17%-ով։ TASS լրատվական գործակալության փոխանցմամբ՝ այս տվյալները հրապարակվել են Առողջապահության համաշխարհային կազմակերպության (ԱՀԿ) և Աշխատանքի միջազգային կազմակերպության (ԱՄԿ) զեկույցում։
«Հետազոտության համաձայն՝ շաբաթական 55 ժամ կամ ավելի աշխատելու պատճառով ինսուլտի ռիսկը կարող է աճել 35%-ով, իսկ սրտի իշեմիկ հիվանդությունից մահվան ռիսկը՝ 17%-ով՝ 35-40 ժամ տևող աշխատանքային շաբաթվա համեմատ», – նշել են փորձագետները։
Զեկույցում ասվում է, որ 2016 թ.-ին 398,000 մարդ մահացել է ինսուլտից և 347,000 մարդ՝ սրտի հիվանդությունից «այն պատճառով, որ նրանք շաբաթական աշխատում էին առնվազն 55 ժամ»: 2000-ից մինչև 2016 թվականը աշխատանքի չափազանց երկար ժամերի հետ առնչվող ինսուլտից մահվան դեպքերն աճել են 19%-ով, իսկ սրտային հիվանդություններից՝ 42% -ով: Չափից երկար աշխատաժամերը հատկապես մեծ ազդեցություն են գործում տղամարդկանց առողջության վրա, որոնց բաժին է ընկում մահվան դեպքերի 72% -ը: Ընդ որում, չափազանց շատ աշխատող մարդկանց թիվը «աճում է և այժմ կազմում է աշխարհի բնակչության 9%-ը»:
Ըստ ԱՀԿ-ի ղեկավար Թեդրոս Գեբրեյեսուսի՝ ոչ մի աշխատանք չարժե, որ մարդն իրեն ինսուլտի կամ սրտի հիվանդության վտանգի տակ դնի։ Նա հիշեցրել է, որ «COVID-19-ի համավարակն էապես փոխել է շատերի աշխատանքի ձևը», իսկ հեռավար աշխատանքը «դարձել է սովորական երևույթ շատ ոլորտներում՝ հաճախ խափանելով տան և աշխատանքի սահմանը»: Բացի այդ, շատ ընկերություններ ստիպված են եղել կրճատել իրենց գործունեության մասշտաբները, միջոցներ ձեռնարկել գումար խնայելու համար: Դրա պատճառով մյուս աշխատողները ստիպված ավելի երկար ժամեր են աշխատում, քան նախկինում։
ԱՀԿ-ն կողմ է արտահայտվել երկրներում այնպիսի օրենքների ընդունմանը, որոնք կարգելեն չափից երկար աշխատաժամեր աշխատելը։ Ըստ ԱՀԿ-ի՝ գործատուները և արհմիությունները կարող են համաձայնության գալ ճկուն աշխատանքային գրաֆիկների շուրջ, որոնք միաժամանակ կնախատեսեն աշխատանքային ժամերի սահմանափակում: