Հույս ունեինք, որ ՁԻԱՀ-ի հանրապետական կենտրոնը Նորք Ինֆեկցիոն կլինիկական հիվանդանոցին միացնելու որոշումը կայացնելուց առաջ մեկ հանդիպում կկազմակերպվի կենտրոնի բուժաշխատողների հետ, բայց այդ հանդիպումը այդպես էլ չկայացավ։
Այս մասին NoyanTapan.TV-ի տաղավարում խոսեց ՁԻԱՀ-ի կանխարգելման հանրապետական կենտրոնի բժիշկ-համաճարակաբան Էդուարդ Հովհաննիսյանը։
Ինչպես վերջերս հայտնի դարձավ՝ սույն թվականի հունվարին 30-ին Կառավարության կայացրած որոշման համաձայն ՁԻԱՀ-ի կանխարգելման հանրապետական կենտրոնը պետք է միանա Նորք Ինֆեկցիոն կլինիկական հիվանդանոցին
Համաճարակաբանը ընդգծում է, որ կենտրոնը մինչ օրս դրական արդյունքներ է գրանցել և հարց է ծագում, թե որն է փոփոխություններ մտցնելու նպատակը։
«Մենք բարձրաձայնում ենք, քանի որ տեսնում ենք մեծ խնդիրներ այս որոշման մեջ։ Վերջին տարիների ընթացում ՁԻԱՀ-ի կենտրոնը բավականին արդյունավետ է աշխատել ու գնահատվել է և՛ մեր պետական կառույցների, և՛ միջազգային կառույցների կողմից։ Արդյունավետության ցուցանիշը վստահորեն բարձր է եղել, որի շնորհիվ հասել ենք բավականին մեծ նվաճումների։ Եվ այստեղ հարց է առաջանում, թե ինչը պետ է փոփոխվի և բարելլավվի։ Եթե մենք փոփոխություն ենք կատարում, ապա դա ու՞մ է ուղղված։ Եթե ուղղված է պացիենտին, ապա ի՞նչ է շահելու նա, եթե ուղղված է բուժաշխատողին, ապա ի՞նչ է շահում բուժաշխատողը»։
Բժիշկ-համաճարակաբանի խոսքով` որոշումից առաջ քննարկում չի եղել, և նախարարության աշխատակիցները ՁԻԱՀ-ի կենտրոնի աշխատակիցների հետ հանդիպումներ չեն կազմակերպել։
«Մի քանի անգամ եղել են հանդիպումներ, երբ ինքներս ենք փորձել բարձրաձայնել այս խնդիրը։ Արդեն մեկ տարի է ինչ մենք գիտենք, որ այս թեմայի շուրջ քննարկումներ են ընթանում և որոշակի աշխատանքներ են տարվում։ Տարբեր նամակներ ենք գրել, բայց բուն մասնագիտական քննարկում ոչ մի անգամ չի կազմակերպվել»,- եզրափակեց Էդուարդ Հովհաննիսյանը։
Աննա Գալուստյան
