Բակտերիաների որոշ տեսակներ հաջողությամբ փոխում են իրենց ձեւը, երբ երկար ժամանակ ենթարկվում են հակաբիոտիկների ազդեցությանը: Դա օգնում է նրանց ավելի լավ խուսափել այդ դեղամիջոցների ազդեցությունից: Այդ մասին նշված է Nature Physics գիտական պարբերականում հրապարակված նոր հետազոտության մեջ:
Կարնեգի Մելոն համալսարանից գիտնականները պարզել են, որ որոշ բակտերիաներ փոխում են սեփական բնութագրիչները, որպեսզի ավելի լավ ադապտացվեն շրջապատող միջավայրին: Մասնավորապես, նրանք կարող են փոխել ձեւը հակաբիոտիկների հետ երկարաժամկետ շփման դեպքում:
Գիտնականները կենտրոնացրել են ուշադրությունը հակաբիոտիկների նկատմամբ Caulobacter crescentus բակտերիաների արձագանքի վրա: Նրանք իրականացրել են գիտափորձը մեկ բջջի եւ տեսական մոդելավորման շուրջ: Պարզվել է, որ ձեւի փոփոխության դեպքում այդ բջջի մոտ առաջանում է հետադարձ կապի ռազմավարության նման արձագանք, որն օգնում է բակտերիաներին հարմարվել գոյատեւելու համար ամենահզոր հակաբիոտիկների հետ շփման դեպքում: Այսպես, բակտերիաները դարձել են ավելի կորացած եւ լայն:
Հաճախ այդպիսի փոփոխությունները նկատվել են հակաբիոտիկների չափաբաժնի կրճատման դեպքում, ինչը ցույց է տալիս սխալ ընտրված դեղամիջոցների, ընդհատված բուժման կուրսի եւ ինքնաբուժության ծայրահեղ վտանգը: Միայն բժիշկը գիտի՝ ինչ քանակությամբ հակաբիոտիկներ են անհրաժեշտ հիվանդությունը լիարժեք հաղթահարելու համար, եւ պացիենտը որքան պետք է ընդունի դրանք: Եթե անգամ մարդն ինքն է լուծում այդ խնդիրը, կա վտանգ, որ նա կարող է իր օրգանիզմում «դաստիարակել» հակաբիոտիկակայուն բակտերիաներ:
