Նույնիսկ օգտակար ու առողջ համարվող սնունդը չի կարելի օգտագործել անսահմանափակ քանակով: Ինչպես պնդում է սննդաբան Սյուզի Բարելը (Ավստրալիա), առողջ համարվող սննդում նույնպես կարող է մեծ քանակությամբ կալորիա, շաքարով եւ ածխաջրեր պարունակվել։
Ինչպես պատմում է The Daily Mail-ը, սմուզին այսօր առողջ սննդամթերք է համարվում: Բայց թեեւ պատրաստվում է թարմ մրգերից, ընկույզներից եւ մածունից, այն դժվար է առողջ եւ հավասարակշռված սննդակարգում ընդգրկել: Քանի որ սմուզիի մեկ բաժինը կարող է պարունակել մինչեւ 800 կալորիա եւ 80 գրամ շաքար, այս մթերքը օգտագործող մարդիկ կարող են գերազանցել օրական նորման:
«Պետք է հիշել, որ սմուզին կերակրի լիարժեք ընդունում է, այլ ոչ թե ուտելիքին լրացնող ըմպելիք»,- ասել է Բարելը:
Օգտակար ու առողջ համարվող մեկ այլ շատ կալորիական սնունդ է գորշ կամ սպիտակ բրինձը: Մասնագետի խոսքով՝ մեկ բաժակ եփած բրինձը պարունակում է 40 գրամ ածխաջրեր, ինչը համապատասխանում է սպիտակ հացի 3-4 կտորի:
Չրերը, որոնք հաճախ վաճառվում են առողջ սննդի խանութներում, նույնպես շատ կալորիական են եւ կարող են մեծ քանակի շաքար պարունակել: Ըստ Բարելի՝ թարմ մրգերը նախընտրելի են չրերից:
Իսկ թխած չիփսերից, որոնք հաճախ գովազդվում են որպես սովորականների առողջ այլընտրանք, ավելի լավ է հեռու մնալ: Դրանցում, իսկապես, կալորիաները, ճարպը եւ շաքարը քիչ է, բայց սննդային արժեք էլ չկա, ասում է փորձագետը:
