ԱՄՆ-ի Ֆլորիդա նահանգում կորոնավիրուսի դեմ Pfizer տեսակի պատվաստանյութով պատվաստվելուց մի քանի շաբաթ անց բժիշկ է մահացել:
Բժիշկը 56-ամյա մանկաբարձ-գինեկոլոգ Գրեգորի Մայքլն էր, որն աշխատում էր Մայամիի Mount Sinai բժշկական կենտրոնում: Նշվում է, որ նրա մահվան պատճառը հեմորագիկ ինսուլտն էր:
Մահացածի կինը ֆեյսբուքյան էջում տեղեկացրել է, որ ամուսինը պատվաստվել է դեկտեմբերի 18-ին, որից մի քանի օր հետո մաշկի վրա կարմիր բծերի տեսքով ռեակցիա է նկատել, ինչը սկսվել է ենթամաշկային արյունազեղման պատճառով: Մայքլը շտապ գնացել է հիվանդանոց, որտեղ բժիշկները պարզել են, որ նա թրոմբոցիտների սուր պակաս ունի:
«Նա պատվաստանյութի պաշտպանն էր, ուստի ինքն էլ էր պատվաստվել: Կարծում եմ, որ մարդիկ պետք է իմանան, որ կողմնակի բարդություններ կարող են տեղի ունենալ, որ (պատվաստանյութը) բոլորի համար լավ չէ, և այս դեպքում այն ոչնչացրել է գեղեցիկ կյանք, իդեալական ընտանիք և ազդել է այսքան շատ մարդկանց վրա»,-գրել է կինը:
Պատվաստանյութեր արտադրող Pfizer ընկերությունը հայտնել է, որ կանցկացնի իր սեփական հետաքննությունը Գրեգորի Մայքլի մահվան կապակցությամբ:
