Այսօր՝ փետրվարի 4-ը, քաղցկեղի դեմ պայքարի միջազգային օրն է։ Առողջապահության նախարարությունում հրավիրված ասուլիսի ժամանակ, խոսելով վիճակագրության մասին, ՀՀ ԱՆ «Վ.Ա.Ֆանարջյանի անվան ուռուցքաբանության ազգային կենտրոնի» տնօրեն Նարեկ Մանուկյանը նշեց, որ քաղցկեղից տարեկան մահանում է մոտավորապես 5 հազար մարդ, սակայն թիվը ճշգրտելու կարիք կա դեռևս:
Լրագրողի դիտարկմանը, թե արդյոք տղամարդկանց և կանանց հիվանդությունների վիճակագրությունը նույնպես ունի ճշգրտման կարիք, Մանուկյանը պատասխանեց. «Կարող ենք ներկայացնել 2017 թվականի տվյալները, ըստ որի 8379 դեպք է գրանցվել, որից 4220 եղել են տղամարդիկ, 4169՝ կանայք: Ինչ վերաբերում է երեխաներին, տարեկան արձանագրվում է մոտավորապես 70 դեպք: Տղամարդկանց մոտ ավելի լայն տարածում ունի թոքի քաղցկեղը, կանանց մոտ՝ կրծքագեղձի»:
Ուռուցքաբանության գծով ԱՆ խորհրդատու Հայկուհի Գյոկչյանն էլ հավելեց. «Կրծքագեղձի ապրելիության տարիների տոկոսը վերջին մի քանի տարիներին բարձրացել է ավելի վաղ դիմելու հաշվին: Մենք կրծքագեղձի առումով մոտենում ենք եվրոպական թվերին՝ մոտ 67 տոկոս»:
Նա նաև հիշեցրեց, որ Հայաստանը առաջին տեղում չէ հիվանդության դեպքում, այն առաջին տեղում է մահացության առումով, պատճառը բժշկի ուշ դիմելն է»։
