Ինչպես տեղեկացնում է «Ինտերֆաքսը»՝ հղում կատարելով փոխվարչապետ Տատյանա Գոլիկովային, Ռուսաստանը փակում է գրեթե բոլոր ավիաուղղությունները Չինաստանի հետ՝ կորոնավիրուսի հետ կապված։
Խոսքը վերաբերում է բոլոր չվերթներին, բացառությամբ «Աերոֆլոտի» կանոնավոր երթուղիներից դեպի Պեկին, Շանհայ, Գուանչժոու եւ Հոնկոնգ, ինչպես նաեւ չինական ավիաուղիների կանոնավոր չվերթները Շերեմետեւո օդանավակայան։
Չինաստանի հետ ավիահաղորդակցության նոր ռեժիմը կմտցվի շաբաթ օրը՝ փետրվարի 1-ի գիշերը։
Հիշեցնենք, որ ավելի վաղ հայտնի էր դարձել Ռուսաստանի տարածքում կորոնավիրուսով վարակված առաջին երկու դեպքը։ Հիվանդները գտնվում են Անդրբայկալում եւ Տյումենի մարզում։ «Ռոսպոտրեբնադզոր»-ի ղեկավար Աննա Պոպովայի խոսքով՝ նրանց վիճակը կայուն է, առանց կլինիկական դրսեւորումների եւ ջերմության։ Նշենք, որ երկուսն էլ Չինաստանի քաղաքացի են։
Ըստ վերջին տվյալների՝ վիրուսով վարակվել է մոտ 10 հազար մարդ, 213-ը մահացել է։ 171 պացիենտ լիովին բուժվել է։ Վարակը հասել է մինչեւ ԱՄՆ, Մեծ Բրիտանիա, եվրոպական որոշ երկրներ եւ Հարավարեւելյան Ասիայի պետություններ։
