Ստեփանակերտի մարդասիրական արձագանքման միջգերատեսչական կենտրոնն ուրբաթ օրվանից անցնում է լիակատար աշխատանքի, հայտնել է Ռուսաստանի Դաշնության Պաշտպանության կառավարման ազգային կենտրոնի ղեկավար, գեներալ-գնդապետ Միխայիլ Միզինցեւը` նշելով, որ Լեռնային Ղարաբաղում արյունահեղության դադարեցումից հետո հումանիտար խնդիրներն առաջին պլանում են, փոխանցում է «ՌԻԱ Նովոստի»-ն:
«Ռուսաստանի բարձրագույն ռազմաքաղաքական ղեկավարության ընդունված օպերատիվ որոշումների շնորհիվ հնարավոր եղավ դադարեցնել արյունահեղությունը Լեռնային Ղարաբաղի գոտում: Այժմ ռուս խաղաղապահները հաջողությամբ ապահովում են են տարածաշրջանում խաղաղ կյանքի հաստատման հետ կապված միջոցառումների ամբողջ համալիրը: Այսօր առաջին պլանում են հումանիտար բնույթի խնդիրները»,- ուրբաթ օրը միջգերատեսչական համագործակցության հարցերին նվիրված համաժողովին ասաց Միզինցեւը: «Այդ նպատակով Ստեփանակերտում լիարժեք կսկսի գործել մարդասիրական արձագանքման միջգերատեսչական կենտրոնը»,- հավելել է նա:
Կենտրոնի հիմնական խնդիրներն են մշտական բնակության վայրերը լքած քաղաքացիների վերադարձը, օգնությունն Ադրբեջանին եւ Հայաստանին` քաղաքացիական ենթակառուցվածքների վերականգնման եւ բնակչության բնականոն կյանքի համար պայմաններ ստեղծելու գործում, Ռուսաստանի պետական մարմինների եւ կազմակերպությունների գործունեության համակարգումը` ռազմական գործողությունների արդյունքում տուժած շրջանների բնակիչներին մարդասիրական օգնություն տրամադրելու նպատակով:
Կենտրոնը կոչված է նաեւ օժանդակելու Ադրբեջանի եւ Հայաստանի պետական մարմիններին միջազգային մարդասիրական կազմակերպությունների հետ փոխգործակցության կազմակերպման գործում:
«Կենտրոնի հիմքը Պաշտպանության նախարարության ստորաբաժանումներն են` գործադիր իշխանության այլ դաշնային մարմինների ներգրավմամբ»,- ասել է Միզինցեւը: Նա վստահություն է հայտնել, որ «հետկոնֆլիկտային կարգավորման սիրիական փորձը կօգնի հնարավորինս սեղմ ժամկետում խաղաղ կյանք հաստատել այս անդրկովկասյան տարածաշրջանում»: