Ինչպես տեղեկանում ենք Շիրակի մարզպետարանի պաշտոնական կայքից, մարզպետարանի առողջապահության և սոցիալական ապահովության վարչության պետի ժամանակավոր պաշտոնակատար է նշանակվել Սուսաննա Հովհաննիսյանը։
Հետևյալ պաշտոնի համար դիմել են երկու հոգի՝ Սուսաննա Հովհաննիսյանը և Արման Աղաքարյանը: Ժամկետային աշխատանքային պայմանագիրը կնքվել է Սուսաննա Հովհաննիսյանի հետ:
Վերջինս առողջապահական ոլորտում երկարամյա փորձ ունեցող բժիշկ-թերապևտ է: Նա վերջին 18 տարին զբաղեցրել է ՀՀ առողջապահության նախարարության աշխատակազմի պետական առողջապահական գործակալության Շիրակի մարզային կենտրոնի պետի պաշտոնը։
Հիշեցնենք, որ վարչության պետի պաշտոնը թափուր է 2018 թվականից: Նախկին պետ Մեսրոպ Բզնունու հրաժարականից հետո ընդամենը 4 ամիս վարչության ժամանակավոր պաշտոնակատար եղավ «Գյումրիի մոր և մանկան ավստրիական մանկական հիվանդանոց»-ի բժիշկ-վերականգնողաբան Հասմիկ Պետրոսյանը:
Նշենք նաև, որ մինչ այժմ վարչության պետի պարտականությունները կատարում էր առողջապահության բաժնի պետ Լեյլի Ասլանյանը։