«Իմ քայլը» խմբակցության պատգամավոր Սոֆյա Հովսեփյանն այսօր ԱԺ ամբիոնից անդրադարձավ խնդրին, թե ինչու Մարալիկ համայնք հարակից 17 գյուղերից չեն գնում ծննդօգնություն ստանալու:
Պատգամավորը նշեց, որ ստացել է տվյալներ: Դրանք ուսումնասիրելուց հետո պարզ է դարձել, որ Մարալիկ համայնքը, համարվելով Անի համայնքի կենտրոնը, որևէ տրանսպորտային կապ չունի իր գյուղերի հետ:
Հովսեփյանն ասաց, որ 17 բնակավայրերից 13-ը առհասարակ որևէ կոնտակտ չունի, և եթե այս մարդիկ պետք է օգտվեն իրենց շրջկենտրոնի ծառայություններից, Մարալիկ քաղաքում ինչ-որ փաստաթուղթ կամ ինչ-որ բան պետք է տանեն, պետք է օգտվեն տաքսիներից կամ որևէ այլ միջոցների դիմեն:
Ըստ նրա՝ Առողջապահության նախարարությունն այս խնդիրը չի դիտարկել, քանի որ այն իր տիրույթում չէ:
«Այս հարցը բարձրացնում եմ, որ վարչապետն էլ իմանա: Ընդամենը չորս գյուղ կա, որ ունի տրանսպորտ դեպի Մարալիկ և այս 4 գյուղերի հղիներն են, որ օգտվում են Մարալիկ քաղաքի ծննդատնից»,- ասաց նա:
«Խնդրի կարգավորման համար կխնդրեմ, որ այս հարցը նույնպես ներառեն, եթե մենք ունենանք կապող օղակը բնակավայրերի և Մարալիկի հետ, վստահեցնում եմ ձեզ, որ ոչ թե 150 ծնունդ կլինի, այլ շեմը կբարձրանա մինչև 300, որովհետև 146 հղի գնում է դեպի Գյումրի: Եթե մենք այս քայլերն ենք քննարկում, ապա պետք է հաշվի առնել ընդհանուր ֆորմատով»,- հավելեց պատգամավորը:
