Եթե կա ծննդատուն և բուժհիմնարկ իր պակաս սարքավորումներով, դա խնդիր է, որի լուծման համար անհրաժեշտ է արարել, ստեղծել՝ կլինի դա ֆինանսավորման տեսքով թե հարմարավետ պայմանների ստեղծմամբ: Արարող մարդու համար դա է ուղղությունը: Քանդող մարդու համար փակելն է ուղղությունը: Չկա բուժկենտրոն, չկա խնդիր:
Այս մասին հունվարի 16-ին News.am-ին տված հարցազրուցի ընթացքում մանրամասնեց բժիշկ, ուրոլոգ, առողջապահության կազմակերպիչ Գևորգ Գրիգորյանը:
Բժիշկը չի արդարացնում օպտիմալացման և բուժհիմարկները փակելու ճանապարհը, քանի որ դա կարող է առաջացնել մի շարք խնդիրներ և՛ բնակչության և՛ բուժաշխատողների շրջանում:
«Ես կհասկանայի այդ որոշումը, եթե օրինակ շենքային պայմանների խնդիր լիներ: Որ օպտիմալացումը ոչ թե գնար ռադիկալ ճանապարհով, այլ փորձեին մարդկանց բացատրել, որ, օրինակ, նրանք լավ չեն աշխատել կամ մոտակա մեկ տարվա ընթացքում ծնունդ չեն ունեցել:
Այսօր լուրջ խնդրի առաջ են կանգնում բուժաշխատողները, հատկապես մեծ տարիքի մարդկանց համար աշխատանք գտնելն անհամեմատ բարդ է լինելու: Լուրջ խնդրի առջև է կանգնում նաև բնակչությունը: Ես հարցում եմ ուղարկել առողջապահության նախարարություն, որ պարզ եմ՝ արդյո՞ք հաշվի են առնվել եղանակային պայմանները: Եվ արդյոք սառույցի վրայով հղիին տեղափոխելն ավելի անվտանգ է, քան իրենց բնակավայրում ծնունդ ընդունելը: Այս բոլոր հարցերի պատասխանները չկան, որպեսզի ես կարողանամ ասել` օպտիմալացումը ծանրակշիռ որոշում է»,- պարզաբանում է Գևորգ Գրիգորյանը:
