ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանն, այսօր, օգոստոսի 28-ին հայտնել էր, որ նախքան դպրոցների գործունեության մեկնարկը դպրոցի անձնակազմը (մանկավարժական և վարչական) կթեստավորվի՝ ՀՀ Առողջապահության նախարարության կողմից կազմված ժամանակացույցի և սկզբունքների համաձայն:
Ուսումնական տարվա ընթացքում համաճարակաբանական ցուցման դեպքում դպրոցի անձնակազմի անդամները կթեստավորվեն ըստ ՀՀ Առողջապահության նախարարության կողմից մշակված մոտեցման:
Medmedia.am-ը կապ հաստատեց ՀՀ Առողջապահության նախարարություն, պարզելու համար, թե երբվանից մանկավարժները կսկսեն թեստավորվել և ի՞նչ ընթացակարգ է դրա համար սահմանված։
ՀՀ ԱՆ մամուլի խոսնակ Ալինա Նիկողոսյանը տեղեկացրեց, որ ամբողջ հանրապետությունում մոտ 30 հազար ուսուցիչ և հարկավոր է հասկանալ, նախ, նրանցից քանի՞ տոկոսն է առկա ուսուցմամբ դպրոց հաճախելու․
« Մենք մարզպետարաններ, գյուղապետարաններ ու քաղաքապետարաններ գրություններ ենք ուղարկել, որպեսզի ուսուցիչների տվյալների հավաքագրում արվի։ Քանի որ դասապրոցեսը լինելու է թե՛ առկա, թե՛ հեռակա, հարկավոր է հասկանալ ուսուցիչների քանի՞ տոկոսն է հաճախելու դպրոց, նրանց, տարածքային պոլիկլինիկաներում կտրամադրվի թերթիկներ, որոնցով կհաստատվի, որ առկա ուսուցմամբ դպրոց են հաճախում։ Այս պահին նախարարությունը այդ տեղեկատվության հավաքագրմամբ է զբաղված, որից հետո պարզ կլինեն ժամկետները»,-նշեց Ալինա Նիկողոսյանը։
Իսկ ՀՀ կրթության, գիտության, մշակույթի և սպորտի նախարարության հասարակայնության հետ կապերի և տեղեկատվության վարչության պետի տեղակալ Օֆելյա Կամավոսյանը մեզ հետ զրույցում տեղեկացրեց, որ այս պահին դպրոցի տնօրենների հետ ներքին քննարկումներ են տարվում․
« Մարզ առ մարզ առցանց հանդիպումներ են իրականացվում և տնօրենների հետ բացատրական աշխատանքներ են տարվում, սակայն թեստավորումների ժամանակացույց դեռ նշված չէ»,-նշել է նա։
Հիշեցնենք, որ ԿԳՄՍ փոխնախարար Ժաննա Անդրեասյանը լրագրողների հետ հանդիպմանը նշել էր, որ ուսուցիչները մինչև ուսումնական մեկնարկը կթեստավորվեն և որոշակի քաղաքականություն կունենան արդեն դասերի ժամանակ։ Թեստավորումը կիրականացնի առողջապահության նախարարությունը։ Այն կլինի անվճար։
Ֆինանսական միջոցների վերաբերյալ նա ասել էր, որ գարնան ընթացքում դպրոցները որոշակի խնայություններ են արել և նոր ուսումնական տարվա ընթացքում այդ խնայողություններն օգտագործելու են դպրոցներն ախտահանելու համար, իսկ հետագայում ծախսերը հոգալու են պետական մարմինները, քանի որ գործընթացը պարբերաբար կրկնվելու է։
Սյուզի Ասատրյան
