Երեկ, օգոստոսի 6-ին «Սուրբ Աստվածամայր» ԲԿ էր ընդունվել 15-ամյա տղա, ով ստացել էր ծանր մարմնական վնասվածք անկյունային հղկիչի (բալգարկա) հետ աշխատելու ժամանակ: Հղկիչը ընթացքում կոտրվել ու հայտնվել է երեխայի գլխում, հայտնում են ԲԿ-ից։
Տղան վիրահատվել է, օտար մարմինը հեռացվել: Թեև գիտակից է, բայց գտնվում է վերակենդանացման բաժանմունքում՝ բժիշկների խիստ հսկողության ներքո:
Ունի բաց թափանցող գանգուղեղային վնավածքներ, քթի, ճակատոսկրի, մաղոսկրի, աջ ակնակապիճի միջային պատի բազմաբեկոր կոտրվածքներ: Ճակատային բլթի կոնտուզիոն հեմոռագիկ օջախ:
Բժիշկները վիճակը գնահատում էին ծանր։
Այսօր, օգոստոսի 7-ին Medmedia.am-ը կապ հաստատեց «Սուրբ Աստվածամայր» ԲԿ մամուլի քարտուղար Գևորգ Դերձյանի հետ, ով նշեց, որ տղայի կյանքին այս պահին վտանգ չի սպառնում, առողջականում կա դրական դինամիկա։
« Այս պահին տղան գիտակից վիճակում է, եթե իրեն օրվա ընթացքում լավ զգա, հավանաբար վերակենդանացման բաժանմունքից կտեղափոխվի հիվանդասենյակ»,-տեղեկացրեց նա։
Սյուզի Ասատրյան
