Բոլիվիայում հուսահատ մարդիկ հերթ են կանգնում, որպեսզի քլորի երկօքսիդով՝ թունավոր սպիտակեցնող միջոցով փոքրիկ շշեր գնեն, որը գովազդվում է որպես COVID-19-ի եւ մի շարք այլ հիվանդությունների դեմ բուժման միջոց, հայտնում է AP-ը:
Ախտահանման միջոցը հանրահայտ է, չնայած Բոլիվիայի առողջապահության նախարարությունը նախազգուշացրել է դրա վտանգների մասին, եւ հայտարարել է, որ մայրաքաղաք Լա Պասում առնվազն հինգ մարդ թունավորվել է քլորի երկօքսիդ օգտագործելուց հետո:
Բոլիվիայի ընդդիմության կողմից վերահսկվող կոնգրեսը խթանում է քլորի երկօքսիդի օգտագործումը: Անցյալ շաբաթ Սենատը հավանություն էր տվել այն օրինագծին, որը թույլատրում է «քլորի երկօքսիդի լուծույթի արտադրությունը, մարքեթինգը, մատակարարումը եւ օգտագործումը՝ կորոնավիրուսի կանխարգելման եւ բուժման համար»:
Օրինագիծը պետք է հավանության արժանանա նաեւ ժամանակավոր նախագահ Ժանին Անյեսի կողմից, որը գտնվում է կարանտինում` նոր կորոնավիրուսով վարակման պատճառով։
