Ցանկացած եղանակ «պահանջում է» իրեն հարմար հիգենա և խնամք՝ հատկապես փոքրիկների դեպքում: Սա ի գիտություն ընդունելով MedMedia.am-ը մինչև մեկ տարեկանններ երեխաների խնամքի կազմակերպան մասին զրուցել է Մուրացան համալսարանական հիվանդանոցի մանկաբուժական թիվ 2 կլինիկայի ղեկավար, բ.գ.թ Մարի Դարակչյանի հետ: «Ամռան ընթացքում կարևոր է պահպանել մաշկի հիգիենան, երեխային լողացնել ամեն օր, իսկ շատ շոգ եղանակին՝ օրական 2 անգամ: Լոգանքը պետք է կազմակերպել մաքուր ջրով և մանկական լոգանքի գելով»,-նշեց բժշկուհին ու հավելեց,- «Երեխային պետք է պաշտպանել արևի ուղիղ ճառագայթներից՝ հագցնելով գլխարկ, երկարաթև հագուստ: Եթե երեխան բաց մարմնով արևի ճառագայթների տակ է, ապա պետք է օգտագործել արևապաշտպան քսուքներ»:
Մասնագետի խոսքով՝ այս շրջանում սենյակի օպտիմալ ջերմաստիճան է համարվում միջինը 20 աստիճանը, սակայն հաշվի առնելով մեր տարածաշրջանի առանձնահատկութկունները, կարելի է առավելագույնն ունենալ 24 աստիճան: «Եթե կա օդորակիչ, ապա դրա օգտագործումը ցուցված է շոգ եղանակին, քանի որ ջերմակարգավորման կենտրոնի անբավարար զարգացման հետևանքով երեխան կարող է սենյակի բարձր ջերմաստիճանի պատճառով ջերմել, առատ քրտնել, ջրազրկվել, հրաժարվել սնունդ ընդունել եւ զրկվել առողջ քնից»,-մանրամասնեց Մարի Դարաչյանից:
Այս շրջանում մայրիկներին ամենաշատ տանջող հարցը պատվաստումներն են, ինչին ի պատասխան մանկաբույժը նշեց, որ պատվաստումները շոգ եղանակին արվում են նույն սխեմայով, ինչ մյուս եղանակներին:
Ինչ վերաբերում է սննդին զրուցակիցս ասաց. «Մինչև 1 տարեկան երեխաների սնունդը չի տարբերվում այլ սեզոններին տրվող սննդից: Հաշվի առնելով ջրազրկման մեծ հավանականությունը՝ պետք է կրծքով կերակրվող երեխային առավել հաճախ և երկար կերակրել, իսկ 6 ամսականից մեծ երեխաներին բավականաչափ կրծքի կաթ և ջուր տալ»,-ընդգծեց բժշկուհին:
