Մանկահասակ երեխայի մոտ կրկնակի հետազոտության արդյունքում ՄԻԱՎ վարակ հայտնաբերելու փաստի առթիվ Քննչական կոմիտեում քրեական գործ է հարուցվել:
«Փաստինֆո»-ի այս տեղեկությունը հաստատեցին Քննչական կոմիտեից՝ նշելով, որ քրեական գործ է հարուցվել ՀՀ քրեական օրենսգրքի 123-րդ հոդվածի 3 –րդ մասի 2-րդ կետով: Կատարվում է նախաքննություն:
2019թ. հոկտեմբերի 16-ին ոստիկանության Արաբկիրի բաժնում ստացվել է քաղաքացու՝ ՀՀ գլխավոր դատախազին հասցեագրված դիմումն այն մասին, որ 2019թ. օգոստոսի կեսերից մինչև հոկտեմբերի 11-ն ընկած ժամանակահատվածում անչափահաս թոռնուհին ստացիոնար բուժման մեջ է գտնվել «Արաբկիր» բժշկական կենտրոնում, որտեղ վերջինիս մոտ հայտնաբերվել է ՁԻԱՀ, որով երեխան մինչ այդ վարակված չի եղել:
Նախնական տվյալներով՝ երեխան ամիսներ շարունակ պարբերաբար ջերմել է և 2019թ. օգոստոսի 20-ին տեղափոխվել «Արաբկիր» ԲԿ, որից հետո նրա մոտ հայտնաբերվել է ՁԻԱՀ:
Ձեռնարկված միջոցառումների արդյունքում պարզվել է, որ երեխայի ծնողների մոտ ՁԻԱՀ չի հայտնաբերվել:
Քրեական գործով նախաքննությունն իրականացվում է ՀՀ քննչական կոմիտեի ԵՔՔՎ Արաբկիր վարչական շրջանի քննչական բաժնում, էական նշանակություն ունեցող հանգամանքները պարզելու նպատակով նշանակվել են մի շարք դատաբժշկական փորձաքննություններ:
Հոդված՝ Անահիտ Սարգսյան
