Կորոնավիրուս ունեցող մարդիկ վարակի առաջին օրերին վարակը կարող են ավելի արագ տարածել, քան մյուսները: Այս մասին ճեպազրույցի ժամանակ հայտարարել է համաճարակաբան և Առողջապահության համաշխարհային կազմակերպության արտակարգ հիվանդությունների բաժնի տեխնիկական խմբի ղեկավար Մարիա Վան Կերխովեն:
«Հիմք ընդունելով այն շատ սահմանափակ տվյալները, որոնք մենք հիմա ունենք՝ կարող ենք ասել, որ մարդու օրգանիզմում շատ վիրուսային մասնիկներ են պարունակվում հիվանդության հենց սկզբում, երբ ախտանշանները նոր են սկսում զարգանալ»,- նշել է մասնագետը:
ԱՄՆ-ում և Գերմանիայում գիտնականների կողմից անցկացված նախնական արդյունքների համաձայն՝ մարդիկ, ովքեր ունեն COVID-19 հիվանդության մեղմ ընթացք, վարակիչ են հիվանդության սկզբից մինչև 8-9 օր: Ավելի ծանր ձևով հիվանդները վարակիչ են մնում ավելի երկար ժամանակահատվածով. Վան Կերխովեի խոսքերը մեջբերում է Интерфакс-ը։
