Բալը դիետիկ միրգ է, իսկ դեղագործության մեջ բալի օշարակը հաճախ օգտագործվում է դեղորայքի համը լավացնելու համար:
MedMedia.am-ն այս հրապարակմամբ ներկայացնում է բալի օգտակար հատկություններից մի քանիսը:
- Ժողովրդական բժշկության մեջ, բացի բալի պտուղներից, օգտագործվում են նաև բալի ճյուղերը, տերևներն ու պոչերը:
- Բալի պարունակության մեջ եղած կումարինը և օքսիկումարինը նպաստում են արյան մակարդելիության նորմալացմանը:
- Բալի հյութն օգտագործվում է նաև որպես ջերմիջեցնող միջոց, քանի որ այն հակաբորբոքային նշանակություն ունի:
Եվ, որպեսզի ամբողջ տարվա ընթացքում թարմ բալ ունենաք, խորհուրդ է տրվում այն պահպանել ապակե տարայի մեջ: Սկզբից դարսել բալի տերևները, ապա վրայից բալի պտուղները, հետո նորից մի շարքով դարսել տերևները, կրկին` պտուղները, մինչև որ տարան կլցվի: Ապակե տարան տեղադրեք մութ ու սառը տեղում. արդյունքում` թարմ բալը կարող եք պահպանել մինչև ձմեռ:
MedMedia.am-ը Ձեզ է ներկայացնում բալից պատրաստվող շատ համեղ լիկյորի տարբերակ: Այսպիսով՝ ապակե տարայի մեջ լցնել 1 կգ կորիզներով բալը, ավելացնել 400գ շաքարավազ և խառնել, լավ թափ տալ ու 3-4 օր պահել արևի տակ: Ստացված զանգվածին ավելացնել 0,5 լիտր սովորական օղի, պահել 1,5 ամիս, քամել և վայելել:
Պետք չէ մոռանալ, որ բալը շատ օգտակար է առողջության համար, բայց բալի կորիզների ու սերմերի մեծ քանակությամբ օգտագործումը կարող է նաև թունավորում առաջացնել:
Տաթև Առաքելյան