Վարչապետը հայտարարեց, որ երկու անձ մահացել է, քանի որ չեն կարողացել տեղափոխել վերակենդանացման բաժանմունք, տեղ չի եղել: Այս մասին այսօր ԱԺ մարդու իրավունքների պաշտպանության և հանրային հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստին հիշեցրեց հանձնաժողովի նախագահ, «Բարգավաճ Հայաստան» խմբակցության պատգամավոր Նաիրա Զոհրաբյանը՝ հրավիրելով Մարդու իրավունքների պաշտպան Արման Թաթոյանի ուշադրությունը:
«Կուզենայի Ձեր արձագանքը լսել, որ բուժհաստատություններում տեղ չլինելու պատճառով մարդիկ մահացել են, սրան պետք է իրավական գործընթաց հետևի, թե ոչ պատասխանատվության մասով: Ի վերջո քրեական վարույթ պետք է հարուցվի՝ պարզելու համար մեղավորոներին, քանի որ գործ ունենք մարդկային կյանքերի հետ»,-ասաց նա:
Արման Թաթոյանը նշեց՝ որպեսզի քրեական վարույթ հարուցելու անհրաժեշտության հարցը լուծվի, անհրաժեշտ է հասկանալ կոնկրետ գործի հանգամանքները՝ արդյոք պաշտոնատար անձի մեղքով է եղել, թե ոչ: Նա նշեց, որ մարդու իրավուքնների պաշտպանի իրավասության սահմաններում սպասում են նաև դրա հետ կապված պարզաբանումներին, որպեսզի հասկանան հետագա գործունեությունը:
«Որպես մարդու իրավունքների պաշտպան՝ այս պահին իմ կողմից ժամանակավրեպ կլինի քրեական վարույթի մասին խոսելը, և ճիշտ չի լինի կանխակալ գնահատականներ հնչեցնել».-ասաց նա: