ՀՀ-ում 2018 թ. իրադարձություններից հետո վախի մթնոլորտը զրոյացել է, բայց դրա փոխարեն օրինապահության մթնոլորտը պատշաճ մակարդակի չի հասել. վարչապետի ճեպազրույցը (տեսանյութ)

«Ես ուզում եմ ևս մեկ անգամ արձանագրել, որ մեր հիմնական խնդիրը հակահամաճարակային կանոնների պահպանումն է, և մենք ունենք համոզվածություն, որ այդ կանոնների պահպանումը կբերի կորոնավիրուսի դեպքերի թվի նվազեցման և ընդհուպ զրոյացման: Այդ կանոնները շարադրված են պարետատան որոշումների մեջ, բայց ես ուզում եմ այս իրավիճակի քաղաքական կոնտեքստի մասին խոսել, որովհետև մեր իշխանության ծագումնաբանությունը ըստ էության աշխատում է հենց մեր դեմ այս իրավիճակում, որովհետև Հայաստանում 2018 թ. իրադարձություններից հետո վախի մթնոլորտը զրոյացել է, բայց դրա փոխարեն ցավոք սրտի օրինապահության մթնոլորտը դեռ պատշաճ աստիճանի և մակարդակի չի հասել: Մենք գործ ունենք մի իրավիճակի հետ, երբ կանոնների խախտումների արձանագրման որակի և կոշտության հետ էլ խնդիր ունենք»,- պարետատան նիստից հետո ասաց ՀՀ վարչապետ Նիկոլ Փաշինյանը: «Եթե, ենթադրենք, բանջարեղենի մի կետ շատ չոր կերպով փակվի, ի հայտ կգան մեկնաբանություններ, թե երկրի վարչապետը որոշել է լոլիկի, վարունգի կամ կոշիկի մենաշնորհ հաստատել: Այսօր կեսօրին ես պարետատան նիստ եմ հայտարարել և ընդգծել, որ պարտատան որոշումները պետք է կատարվեն, հաշվի չպետք է առնվի ոչ մի փաստարկ:

Կամ այն փաստի բերումով, որ կանոնները չեն պահպանվում, մենք գնում ենք դեպի համատարած արգելափակումների՝ պարետային ժամ, տնտեսական ցնցումներ: Կամ բոլորս միասին, համագործակելով, հսկողության տակ ենք առնում իրադրությունը: Անկախ այս երկու սցենարներից, պետք է հսկողությունը կատարվի ամենաչոր ձևով՝ հաշվի չառնելով ոչ մի սենտիմենտ, ոչ մի զգացմունքայնություն: Սա է եղել իմ հրահանգը, դրա չիրականացումը կամ թերի իրականացումը բերելու է խիստ պատիժների»,- ասաց վարչապետը:

Անդրադառնալով իր և իր ընտանիքի առողջական վիճակին, Փաշինյանն ասաց. «Մեր ընտանիքը, գիտեք, վարակակիր է, մենք մեկուսացած ենք վարչապետի կեցավայրում, չունենք հիանդության որևէ վառ դրսևորում, ես շարունակում եմ լիարժեք աշխատել՝ որքանով որ դա հնարավոր է: Իմ աշխատանքային գրաֆիկից դուրս են մնացել միայն ընդունելությունները»,- ասաց նա: