Մեր օրերում քնի խանգարումները մեծ տարածում ունեցող խնդիր են համարվում ամբողջ աշխարհում: ԱՀԿ-ի պաշտոնական վիճակագրության համաձայն՝ աշխարհում ամեն երկրորդ բնակիչը տառապում է քնի խանգարումներից:
Առողջ քուն ունենալու համար շատ կարևոր է պահպանել քնի հիգիենան` վարքային դրական սովորությունները, որոնցից մի քանիսը MedMedia.am-ի հետ զրույցում ներկայացնում է ՀՀ ԱՆ խորհրդատու` Նյարդաբանության գծով, «Քնի խանգարումների հայկական ասոցիացիա» ՀԿ-ի հիմնադիր նախագահ Սամսոն Խաչատրյանը:
1. Անհրաժեշտ է ունենալ քնելու և արթնանալու հստակ ռեժիմ: Սա նշանակում է, որ կարևոր է քնել և արթնանալ միևնույն ժամերին, անկախ այն բանից՝ աշխատանքային օր է, թե հանգստյան:
2. Քնելուց 2 ժամ առաջ պետք է խուսափել նյարդային համակարգը կամ հոգեհուզական դաշտը ակտիվացնող իրավիճակներից:
3. Պետք է խուսափել քնել ցերեկային ժամերին: Սա հատկապես բացասաբար կարող է անդրադառնալ անքնություն ունեցողների վրա:
4. Խորհուրդ չի տրվում երեկոյան ժամերին օգտագործել կոֆեին պարունակող ըմպելիքներ և ուտելիքներ` սուրճ, թեյ, կոկա-կոլա, մուգ շոկոլադ:
5. Երեկոյան ժամերին պետք չէ օգտագործել դժվար մարսվող ուտելիք:
6. Ալկոհոլը բացասաբար է ազդում քնի որակի վրա: Այն նպաստում է գիշերվա ընթացքում պարբերաբար արթնանալուն և առավոտյան քնից չբավարարված լինելուն:
7. Անհրաժեշտ է քնել մութ սենյակում, ինչը նպաստում է քնի հորմոնի` մելատոնինի, արտադրմանը մեր օրգանիզմում:
8. Պետք է ձգտել ունենալ ոչ աղմկոտ քնելու միջավայր:
9. Պետք է հետևել սենյակային ջերմաստիճանին:
10. Քնելուց մեկ երկու ժամ առաջ հրաժարվել սմարթֆոններից և այլ սարքերից։
Տաթև Առաքելյան
