Առողջապահության համաշխարհային կազմակերպության ղեկավար Թեդրոս Գեբրեյեսուսը նախազգուշացրել է, որ երկրները կարող են կրկին վերադառնալ կարանտինային ռեժիմի, եթե սահմանափակումների մեղմացումը չիրականացվի փուլային եղանակով, հաղորդում է Reuters լրատվական գործակալությունը:
Օնլայն ճեպազրույցի ժամանակ Գեբրեյեսուսը նշել է, որ կորոնավիրուսի համավարակն, ի վերջո, կնահանջի, սակայն այլևս երբեք հնարավոր չէ վերադառնալ նախկին վիճակին:
ԱՀԿ-ի ղեկավարը երկրներին ուղեցույցներ է տրամադրել՝ կապված տնտեսության վերաբացման հետ՝ հարկավոր է հաշվի առնել նոր դեպքերի նվազումը և վստահ լինել, որ առողջապահական համակարգը կարող է որոշել, մեկուսացնել և բուժել կորոնավիրուսի նոր դեպքերը: ԱՀԿ-ի ղեկավարը նաև ընդգծել է առողջապահական համակարգում ներդրումների կարևորությունը:
Գեբրեյեսուսը հայտնել է, որ ապրիլի սկզբից կազմակերպությանը զեկուցում են օրական շուրջ 80 հազար նոր դեպքի մասին:
Աղբյուրը՝ Shantnews.am
