Մարդու պապիլոմավիրուսը փոխանցվում է մարդուց մարդուն մաշկի միջոցով կամ սեռական ճանապարհով: Տարբերում են վիրուսի 100-ից ավել տեսակներ: Սա ամենատարածված սեռավարակն է: Թեմայի շուրջ MedMedia.am-ը զրուցել է մանկաբարձ—գինեկոլոգ, բ.գ.թ Լիլիթ Հակոբջանյանի հետ: «Սեռական օրգանների, ինչպես նաև մաշկային հյուսվածքների ՄՊՎ—ով վարակվելը հնարավոր է միկրոտրավմաների առկայության դեպքում, ընդ որում՝ ՄՊՎ—ների հավաքատեղի են ծառայում միզածորանը, բարտոլինյան գեղձերը, սերմնահեղուկը»,-ասաց բժշկուհին:
Գինեկոլոգի խոսքով՝ սեռական օրգանների ՄՊՎ վարակն ունի բարձր վարակելիություն. մեկանգամյա սեռական հարաբերության հանգամանքներում վարակվածությունը կազմում է դեպքերի 60 տոկոսը: «ՄՊՎ—ը հանդիսանում է անհրաժեշտ, բայց ոչ բավարար հանգամանք արգանդի վզիկի նեոպլազիայի համար: Հիվանդության զարգացման նախապայմաններ են հանդիսանում սոցիալտնտեսական ոչ բարեհաջող վարկանիշն ու սեռական վարքը, դիմադրողականության խախտումները, ուղեկցող հիվանդությունները, երիտասարդ տարիքը, ծխելը, հղիությունը, հեշտոցային բիոտոպի դիսբակտերիոզը»,-ընդգծեց մասնագետը:
Լիլիթ Հակոբջանյանի խոսքով՝ ինկուբացիոն շրջանը կազմում է 1-3 ամիս: «Դեպքերի մածամասնության մոտ ՄՊՎ-ը որոշ ժամանակ մնում է առանց ախտանիշերի: Արգանդի վզիկի in situ նեոպլազիաների (Intraepithelial) և քաղցկեղի in situ բարձր օնկոգեն ռիսկի ՄՊՎ-ի աճը սովորաբար տեղի է ունենում 5-ից 30 տարվա ընթացքում»,-մանրամասնեց բժշկուհին:
Անրադառնալով վարակի ախտորոշմանը, գինեկոլոգն ընդգծեց, որ ՄՊՎ-ի լաբորատոր ախտորոշումը անց է կացվում ցիտոլոգիական (բջջաբանական), հիստոլոգիական (հյուսվածքաբանական) բիոպտատների, ՄՊՎ-ի հակամարմինների բնորոշնամ, ԴՆԹ ՄՊՎ և Е7 օնկոսպիտակուցի բացահայտման հիման վրա:
«Բուժման մեթոդի ընտրության ժամանակ հաշվի է առնվում անամնեզը, սոմատիկ կարգավիճակը, նախորդող հակավիրուսային թերապիան, տեղակայումը, քանակը, սրածայր և տափակ կոնդիլոմների չափսերը»,-մանրամասնեց զրուցակիցս և ավելացրեց, որ ՄՊՎ վարակով հիվանդներին պետք է զգուշացնել, որ այս հիվանդությունը հանդիսանում է սեռական ճանապարհով փոխանցվող վարակ, ուստի հետազոտություն ու բուժում պետք է անցնեն զուգընկերները, իսկ թերապիայի ընթացքում և մոտակա 6-9 ամիսների ընթացքում խորհուրդ են տրվում հարաբերությունների ժամանակ կիրառել հակաբեղմնավորիչ պաշտպանական մեթոդներ: