Վարչապետ Նիկոլ Փաշինյանը, ինչպես երեկ, այնպես էլ՝ այսօր, ֆեյսբուքյան ուղիղ եթերում հայտնեց ուրախալի լուր կորոնավիրուսի վարակակիրների թվի նվազման վերաբերյալ. երկու օրվա կտրվածքով, մի դեպքում՝ ունենք վարակման 11, մյուսում՝ 20 դեպք:
Վարչապետն այս տեմպը զգուշավոր լավատեսությամբ դրական գնահատեց՝ ընդգծելով, որ, եթե այսպես շարունակվի, ապա ապրիլի 14-ից՝ արտակարգ դրության ժամկետի ավարտից հետո, հնարավոր կլինի վերադառնալ կյանքի բնականոն հուն:
Վարչապետ Փաշինյանի լավատեսությունը, սակայն, չի կիսում համաճարակաբան Էդուարդ Հովհաննիսյանը:
Նրա հիմնավորմամբ՝ համաճարակի ողնաշարը ջարդելու մասին խոսք կարող է գնալ միայն այն ժամանակ, երբ Հայաստանում ամենօրյա ռեժիմով իրականացվի նվազագույնը 1000 թեստավորում:
«Եթե մենք կարողանանք ամեն օր 1000 կամ 2000 թեստ անցկացնել և արդյունքում ունենալ 11 կամ 20 վարակակիր, ապա կարող ենք հույս ունենալ, որ հաջողվել է համաճարակի ողնաշարը կոտրել: Նոր դեպքերը, Աստված գիտի, թե որքան են, որովհետև մեր երկրում մեծ քանակով թեստավորում չի արվում, ինչն արվել է, օրինակ, Գերմանիայում, Սինգապուրում: Օդակաթիլային կամ կաթիլային ճանապարհով տարածվող այս վարակի տարածման տեմպը շատ արագ է, և խոսել օրական 200-300 թեստի և վարակի տեմպի մասին, սխալ է: Դուք պատկերացնո՞ւմ եք, թե մենք մարզերում որքան մարդ ունենք, որոնք չեն ենթարկվել թեստավորման: Մի ամբողջ կոմպլեքս վերլուծություն է պետք անել, սկսած ջերմողների թվից՝ մինչև թոքաբորբով հիվանդներ, որից հետո նոր կկարողանանք խոսել համաճարակի տեմպերի մասին»,- ասաց Հովհաննիսյանը:
Մեր զրուցակիցը խնդրահարույց համարեց նաև նմուշառության իրականացման ընթացքը և նշեց, որ, եթե Հայաստանում նմուշառումն իրականացվում է՝ ինչպես ցուցադրվում էր հեռուստատեսությամբ եթեր գնացած տեսանյութում, ապա դա սխալ է:
«Տեսանյութի մեջ երևում է, որ նմուշ վերցնում են փայտյա շպատելի միջոցով, որի ծայրին ամրացված է բամբակ: Սա չի համապատասխանում միջազգային չափանիշերին, ըստ որոնց՝ շպատելը պետք է լինի պլաստմասսե, իսկ ծայրին ամրացված լինի ոչ թե՝ բամբակ, այլ՝ վիսկոզ: Վիրուսոլոգիայի մեջ բամբակն առաջացնում է կեղծ բացասական պատասխանների հավանականություն: Եթե մեզ մոտ նմուշառման համար օգտագործում են բամբակ, ապա մենք ունենք խնդիր նաև նմուշառության հարցում»,- ասաց էդուարդ Հովհաննիսյանը:
Նա նաև հայտնեց, որ ՁԻԱՀ-ի կենտրոնի իրենց թիմով զբաղվել են կորոնավիրուսի ուսումնասիրությամբ, կազմել վերլուծական մոդելավորում, մշակել են հակազդման պլան և այն Ազգային ժողովի պատգամավորների միջոցով ուղարկել Կառավարություն:
«Մեր կանխատեսումները մինչև վերջին օրերն իրականանում են, սակայն մեր ներկայացրած հակապլանից կամ հակազդման պլանի վերաբերյալ Կառավարությունից որևէ պատասխան չենք ստացել»,- ասաց նա:
Աղբյուրը՝ 168.am
