Նոր Զելանդիայի առողջապահության նախարար Դևիդ Քլարկի կոչումն իջեցվել է։ Դա տեղի է ունեցել համազգային կարանտինի կանոնները խախտելով լողափ գնալուց հետո։
Վարչապետ Ջասինդա Արդերնի խոսքով՝ Քլարկը տեղեկացրել է իրեն կատարվածի մասին և առաջարկել է իր հրաժարականը, գրում է The Guardian- ը:
«Նորմալ պայմաններում ես կհեռացնեի առողջապահության նախարարին: Նրա արածը սխալ էր, և դրան որևէ արդարացում չկա: Բայց այժմ ինձ համար առաջնահերթություն է մեր հավաքական պայքարը COVID-19-ի դեմ … Միայն այդ պատճառով է, որ դոկտոր Քլարկը կպահպանի իր պաշտոնը», – ասել է նա:
Արդերնն ավելացրել է, որ նրան կհեռացնեն ֆինանսների նախարարի օգնականի պաշտոնից, ինչպես նաև կիջեցնեն կոչումը նախարարների կաբինետում:
Առանձին հայտարարության մեջ Քլարկը հայտնել է, որ կարանտին հայտարարելուց հետո առաջին հանգստյան օրերին իր ընտանիքին տարել է լողափ։
Վերջին տվյալների համաձայն ՝ Նոր Զելանդիայում գրանցվել է կորոնավիրուսային վարակի 1160 դեպք, մահացել է 1 մարդ: