Գերմանիայի Համբուրգ երկրամասում անհայտ անձինք սպառնալից նամակ են ուղարկել տեղի թուրք ընտանիքներից մեկին, գրում է «Հուրրիյեթ» պարբերականը:
Ծրարը գցել են 28-ամյա Օնդեր Քոջայի փոստարկղը, իսկ նամակի մեջ գրված է եղել, որ թղթի վրա կորոնավիրուս կա: Քոջան խոստովանել է, որ ապշել է, երբ ընթերցել է նամակը:
Նամակում մասնավորապես գրված է եղել.
«Ես ձեզ անակնկալ ունեմ: Ես վարակված եմ կորոնավիրուսով: Այս նամակի վրա մի քանի անգամ հազացել եմ և մաքրել եմ լեզուս: Ես մենակ չեմ գնալու այս աշխարհից: Իմ վերջին առաքելությունն է Գերմանիան երեխաներիս և թոռներիս թողնել առանց օտարների: Մահացիր, դանդաղ մահացիր: Գերմանիան թող մնա գերմանացիներին: Ես ձեզ ամենայն վատն եմ մաղթում, հուսով եմ, որ վիրուսը արագ կտարածվի ձեր ընտանիքում»:
Նամակի հասցեատերը պատմել է, որ կարդալուց հետո ախտահանել է ձեռքերը և դիմել է ոստիկանություն: Դեպքի մասին նա հայտնել է նաև Համբուրգի թուրքական հյուպատոսությանը:
Քոջան դիմել է Համբուրգի բժիշկներին, նրանք ասել են, որ թղթից վիրուսի փոխանցման հավանականությունը շատ ցածր է: Այնուամենայնիվ տղամարդը մեկ շաբաթ մնացել է տանը և աշխատանքի չի գնացել:
«Հուրրիյեթ»-ի պնդմամբ՝ նամակի հեղինակները գերմանացի ֆաշիստները և ռասիստներն են:
Առողջապահության համաշխարհային կազմակերպությունը մարտի 11-ին նոր կորանավիրուսը համավարակ էր հայտարարել: Վերջին տվյալներով՝ աշխարհում գրանցվել է վարակման 859 338 դեպք, 42 334-ը՝ մահվան ելքով, ապաքինվել է 178 125 մարդ։ Համաճարակի օջախ Չինաստանի սահմաններից դուրս վարակը տարածվել է 203 երկրում:
Աղբյուրը՝ tert.am
