Սրտանոթային հիվանդությունների դեմ պայքարում ծխելուց հրաժարվելը հինգ անգամ ավելի արդյունավետ է, քան զարկերակային ճնշումը վերահսկելը, եւ երեքուկես անգամ ավելի արդյունավետ է, քան խոլեստերինի մակարդակը վերահսկելը: Այս մասին NEWS.am Medicine-ի թղթակցի հետ զրույցում ասաց Բժշկական ռիսկերի մոդիֆիկացման ռուսական ասոցիացիայի ղեկավար, սրտաբան Ալեքսանդր Ռոզանովը։
Նա թվարկեց սրտանոթային հիվանդությունների ռիսկի գործոնները՝ նշելով, որ դրանք վաղուց հայտնի են.
- Ոչ ճիշտ սնունդը
- Ծխելը
- Ալկոհոլի չարաշահումը
- Պասիվ կենսակերպը
- Ավելորդ քաշը
- Զարկերակային բարձր ճնշումը։
Եթե առկա են ռիսկի բոլոր գործոնները, ապա, ըստ բժշկի, «երկար ու երջանիկ ապրելու հնարավորություն չկա ընդհանրապես»: «Այնուհանդերձ, եթե վերլուծենք այս գործոններից յուրաքանչյուրի ներդրումը պացիենտների գոյատեւման գործում, ապա ծխելուց հրաժարվելը հինգ անգամ ավելի արդյունավետ է, քան արյան ճնշումը վերահսկելը եւ երեքուկես անգամ ավելի արդյունավետ, քան խոլեստերինի մակարդակը վերահսկելը: Այնպես որ՝ պետք է ընտրել: Իսկ ավելի լավ է, եթե այդ ամենը համադրվի: Այսինքն՝ չծխել, վերահսկել ճնշման մակարդակը եւ խոլեստերինի մակարդակը»,- ասել է նա։
Նյութի աղբյուրը՝ NEWS.am Medicine
