2004 թվականի հոկտեմբերի 12-ին ՀՀ-ը վավերացրել է ծխախոտի դեմ պայքարի շրջանակային կոնվենցիան։ Այդ կոնվենցիային միացել են ևս 181 երկիր և պայքարն իրականացվում է ամբողջ աշխարհում։ Իսկ հոկտեմբերի 12-ը ծխելու դեմ պայքարի ազգային օրն է: Այս մասին լրագորղների հետ հանդիպմանն ասաց ՀՀ ԱՆ հանրային առողջության բաժնի գլխավոր կազմակերպիչ Մարիամ Մնացականյանը։
«Ծխախոտի վնասակարության մասին շատ է խոսվել։ Ծխախոտի դերը իրոք գերակա խնդիր է ամբողջ աշխարհի առողջապահական համակարգերի համար այդ թվում և Հայաստանի։ Այն հանդիսանում է ռիսկի գործոն շատ ծանր հիվանդությունների համար, որոնք հիմնական հանդիսանում են մահացության պատճառը, ինչպես Հայաստանում, այնպես էլ ամբողջ աշխարհում»,-նշել է Մնացականյանը՝ հավելելով, որ այդ հիվանդություններն են սիրտ-անոթային համակարգի հիվանդությունները, շնչառական համակարգի հիվանդությունները, շաքարային դիաբետը, քաղցկեղը։
Նա նաև անդրադարձավ վիճակագրական տվյալներին, ըստ այդմ՝ չարորակ նորագոյացությունները կազմում են 14,8 %, շաքարային դիաբետը 1,3 % և շնչառական օրգանների հիվանդությունները 8,3% մահացություն։
«Ինչ վերաբերվում է ծխախոտի օգտագործմանը, ապա մեր վերջին՝ դեռ 2017 թվականին իրականացված հետազոտության տվյալներն են, որոնց համաձայն Հայաստանում ընդհանուր ծխողների քանակը մոտ 28 տոկս է։ Ընդ որում 50 %-ից ավելին տղամարդիկ են, իսկ կանանց շրջանում՝ 1,8 տոկոս»,-հայտնեց նա։
ՀՀ ԱՆ առողջապահության ազգային ինստիտուտի տնօրեն Ալեքսանդր Բազարչյանը նշեց, որ վերընշված ցուցանիշը բարձր է։
Լուսինե Մարդոյան