Այսօր սեպտեմբերի 1-ն է, նոր ուսումնական տարվա մեկնարկը տրված է։ Դպրոցի միջանցքներում, դասարաններում եռուզեռ, երեխաների կուտակումներ, և այս ամենի ֆոնին՝ կորոնավիրուսային հիվանդության և այլ սուր շնչառական վարակների ակտիվացում։
Երեկ՝ օգոստոսի 31-ին MedMedia.am-ի հետ զրույցում Առողջապահության նախարարությունից հայտնել էին, որ այս պահին համաճարակային իրավիճակը թույլ է տալիս որևէ սահամանափակում չկիրառել։ «Այս պահին դպրոցներում նորից դիմակ կրելու որևէ պարտավորություն չկա, համաճարակային իրավիճակը կայուն է և մեր հսկողության տակ, եթե այն սրվի իհարկե կկիրառվեն որոշակի սահմանափակումներ և դրանց մասին պաշտոնապես կհայտարարենք»։
Սակայն, այսօր, երբ ուսումնական տարին սկսվեց, ՀՎԿԱԿ-ից ասում են՝ վարակի վերարտադրողականության ցուցանիշը գերազանցում է 1-ը, ինչը ցույց է տալիս, որ առկա է հիվանդացության աճի շարունակական միտում: Ուստի, սա այնքան էլ նման չէ վերը նշված «կայուն» վիճակին։ Ինչ վերաբերում է նոր ուսումնական տարվա մեկնարկին, ապա այստեղ ևս ինչ-որ բան այն չէ։ ՀՎԿԱԿ-ի հրապարակման մեջ նշված է՝ մեծացնել նստարանների միջև հեռավորությունը, բացահայտել և մեկուսացնել սուր շնչառական վարակի ախտանշաններով անձանց (աշակերտներին և ուսուցիչներին), ախտահանել աշխատատեղերն ու դասասենյակները, հաճախակի օդափոխել փակ տարածքները:
Այսպիսով, խստացումներ սպասվու՞մ են։ Մի կողմից ասում են՝ կայուն վիճակ, որևէ սահանափակում չկա, մյուս կողմից՝ ոչ «ուղիղ», սակայն հորդորում են վերադառնալ նախկին օրակարգին՝ բացառությամբ դիմակների կրման պարտադրանքի։ Ուսումնական տարին նոր է սկսվել, քովիդի թվերն էլ այս շրջանում շարունակաբար աճում են, հետևելով ուսումնական գործընթացին՝ կտեսնենք, թե իրականում այս երկու մոտեցումներից ո՞րն էր ավելի իրատեսական։
Օֆելյա Պողոսյան
