Անցած շաբաթվա ընթացքում աշխարհում կորոնավիրուսով վարակման նոր դեպքերի թիվը կազմել է 6,6 միլիոն, ինչը 0,6 միլիոնով պակաս է նախորդ 7-օրյա ժամանակահատվածի համեմատ, հայտնում է ՏԱՍՍ-ը։ Հաշվարկների համաձայն՝ Covid-ի դեպքերը յոթ շաբաթվա ընթացքում առաջին անգամ նվազել են.
Անցած շաբաթվա ընթացքում մոտ 15 հազար մարդ է մահացել Covid-ի պատճառով՝ մոտավորապես նույնքան, ինչ նախորդ շաբաթ։
Կայունացում և անկում
ԱՄՆ-ում հիվանդացությունը հասել է բարձր մակարդակի. արդեն երկրորդ շաբաթն է՝ այնտեղ օրական մոտ 100 հազար վարակակիր է հայտնաբերվում։ Բրազիլիայում այն նվազել է մեկ քառորդով. այժմ երկրում մոտ 35-40 հազար մարդ ամեն օր Covid թեստի դրական արդյունք է ստանում։ Մեքսիկայում ցուցանիշները նվազել են մեկ երրորդով՝ օրական մինչև 20 հազար դեպք:
Եվրոպական երկրներում կտրուկ անկում է նկատվում։ Ֆրանսիայում և Իտալիայում հիվանդացությունը նվազել է մեկուկես անգամ։ Այժմ այնտեղ օրական մոտ 40 հազար վարակակիր է հայտնաբերվում։
Որտե՞ղ է դեռ աճը
Եվրոպայում բացառություն է կազմում Գերմանիան, որտեղ վարակվածության մակարդակը դեռ շատ բարձր է. այնտեղ ամեն օր ավելի քան 80,000 մարդ է ախտորոշվում COVID-19-ով։ Ամենամեծ աճը գրանցվում է ասիական երկրներում։ Այսպիսով, Հարավային Կորեայում օրական գրանցվում է ավելի քան 80 հազար նոր դեպք, ինչը երկրի համար առավելագույն ցուցանիշ է ապրիլի վերջից: Հիվանդության պայթյունավտանգ աճ է նկատվում Թուրքիայում, որտեղ աճել է վարակի տարածման տեմպը՝ շաբաթական մեկուկես անգամ: Վերջին օրերին այնտեղ ավելի քան 50 հազար նոր դեպք է գրանցվել։ Այնուամենայնիվ, ինչպես տարածաշրջանում, այնպես էլ աշխարհում ամենաբարձր ցուցանիշներն այժմ Ճապոնիայում են, որտեղ օրական ավելի քան 200 հազար մարդ է ախտորոշվում կորոնավիրուսով, սրանք համաճարակի ամենաբարձր ցուցանիշներն են։
