Ի՞նչ պատկեր ունենք կորոնավիրուսի առումով։ Աշխարհում կարծես, հոսպիտալացվածների թիվը նվազել է, հիվանդանոցների քովիդ բաժանմունքները փակվել են, բայց Առողջապահության համաշխարհային կազմակերպությունը շարունակում է զգուշացումները․ քովիդը չի նահանջել ու հարկավոր է զգուշանալ, ավելին, հորդորում է չկորցնել զգոնությունը և շարունակել պատվաստվել։
Ավելին, ԱՀԿ-ն աշխարհի բոլոր երկրներին կոչ է անում վերադարձնել դիմակի ռեժիմը։
ԱՀԿ ղեկավար Թեոդոր Ադհանոմ Գեբրեյեսուսը մտհոգություն է հայտնել․
«Ես մտահոգված եմ, որ COVID-19-ի դեպքերի թիվը շարունակում է աճել, ինչը լրացուցիչ ճնշում է ծանրաբեռնված առողջապահական համակարգերին և բուժաշխատողներին», — մեջբերում է SkyNews-ը: Այդ մասին գրում է «Известия»-ն։
«Հիվանդության նոր ալիքները ցույց են տալիս, որ COVID-19-ը դեռ չի ավարտվել», — ասել է նա՝ նշելով, թե, այդուհանդերձ, երկրները «շատ ավելի լավ վիճակում են, քան համաճարակի սկզբում»։
ԱՀԿ-ն անհրաժեշտ է համարում հարմարվել COVID-19-ի նոր իրականությանը։
Առողջապահության համաշխարհային կազմակերպությունը (ԱՀԿ) անհրաժեշտ է համարում դասեր քաղել ասիական երկրների փորձից՝ վիրուսային վարակների բռնկումներին հակազդելու հարցում։ Այս մասին երեքշաբթի Reuters-ին տված հարցազրույցում ասել է ԱՀԿ եվրոպական գրասենյակի տնօրեն Հանս Կլյուգեն։
Նրա խոսքով՝ համաշխարհային հանրությունը պետք է հարմարվի նոր իրականությանը, որպեսզի խուսափի ավելի խիստ միջոցների ներդրումից՝ կապված կորոնավիրուսի BA.5 օմիկրոն շտամի տարածման հետ։
Նա կոչ է արել վերադառնալ դիմակներ կրելու պրակտիկային, ինչպես նաև արագացնել պատվաստումները՝ պետությունների առողջապահական համակարգերը թեթեւացնելու համար։
«Մենք տեսնում ենք կորոնավիրուսի դեպքերի աճ»,- ասել է նա, նշելով, որ հասարակությունը պատրաստ չէ նոր արգելափակումների։
Հիշեցնենք, որ անցած շաբաթ եվրոպական երկրներում գրանցվել է կորոնավիրուսով վարակման մոտ 3 միլիոն դեպք, ինչը կազմում է աշխարհում վարակվածների գրեթե կեսը, հավելել է Կլյուգեն։
Նշենք, որ ըստ ԱՀԿ-ի՝ հունիս ամսվա վերջին շաբաթվա ընթացքում կորոնավիրուսի նոր դեպքերի թիվն աճել է 18%-ով, ընդ որում աշխարհում գրանցվել է ավելի քան 4,1 միլիոն դեպք։ Համաձայն ԱՀԿ տվյալների՝ COVID-19-ի նոր դեպքերի ամենամեծ շաբաթական աճը գրանցվել է Մերձավոր Արևելքում, որտեղ դրանք աճել են 47%-ով, Եվրոպայում և Հարավարևելյան Ասիայում՝ մոտ 32%-ով, իսկ Ամերիկայում՝ մոտ 14%-ով։
Ս․ Ա․