Մարզային բուժհաստատություններում առաջիկայում էլեկտրոնային ընդունարաններ են ներդրվելու, ինչը հնարավորություն կտա մարզային հիվանդանոցներին ևս օգտվել էլեկտրոնային առողջապահության գործիքներից:
«Էլեկտրոնային առողջապահության ազգային օպերատոր» ընկերության մասնագետները օրերս ուսուցումներ էին իրականացնում մարզային խոշոր՝ «Գյումրու բժշկական կենտրոն» և «Վանաձորի բժշկական կենտրոն» հիվանդանոցներում, աշխատակիցներին ծանոթացնում էլեկտրոնային ընդունարանների գործիքների կիրառմանը:
Էլեկտրոնային ընդունարանների հիմնական գործառույթը պացիենտների այցերը էլեկտրոնային եղանակով գրանցելն է. դրա հիման վրա ձևավորվում են նաև բուժհաստատությունների էլեկտրոնային մատյանները:
«Առաջին փուլում իրականացվեց ընդունարանների աշխատակիցների ուսուցում, որի արդյունքում մոտ ժամանակներում նրանք հնարավորություն կունենան էլեկտրոնային եղանակով գրանցել այցերը: Հետագայում ակնկալում ենք էլեկտրոնային առողջապահության գործիքների ընդլայնում, ինչն ապագայում անհամեմատ հեշտացնելու է մարզային բուժհաստատությունների աշխատանքը և ավելի արդյունավետ է դարձնելու գործընթացների կառավարումը»,- ասում է «Էլեկտրոնային առողջապահության ազգային օպերատոր» ընկերության Բժշկական գործընթացների կառավարման բաժնի ներկայացուցիչ Արամ Ղուլիջանյանը:
