Աշխատանքի և սոցիալական հարցերի նախարարությունը շարունակում է պատվիրակման միջոցով տնային խնամքի ծառայություններ տրամադրել հոգեկան առողջության խնդիրներ ունեցող անձանց։
Նախարարության տեղեկացմամբ՝ այս նպատակով պետական բյուջեից 2022 թ․ համար հատկացվել է շուրջ 12 մլն դրամ։
Տրամադրվող ծառայություններն ուղղված են խնամքի կարիք ունեցող, կյանքի դժվարին իրավիճակում հայտնված և հոգեկան առողջության խնդիրներ ունեցող 18 տարին լրացած անձանց խնամքի ու սպասարկման կազմակերպմանը։ Դրանք տրամադրվում են անձի բնակության վայրում՝ գնահատված սոցիալական կարիքներին համապատասխան:
Տնային խնամքը ներառում է՝
սոցիալական խորհրդատվության տրամադրում շահառուին և նրա ընտանիքին, հոգեբույժի պարբերական հսկողություն և խորհրդատվություն, շահառուի սոցիալական ներառմանն ու համայնքային կյանքին մասնակցությանն ուղղված միջոցառումների իրականացում, հոգեբանական օգնություն, բժշկական օգնության կազմակերպում, այդ թվում՝ աջակցություն դեղերի ստացման գործընթացում, շահառուի շահերի, իրավունքների պաշտպանություն և իրավական խորհրդատվության տրամադրում, կենցաղային սպասարկում, շահառուի սոցիալական կարողությունների և հմտությունների զարգացում, ինքնուրույն կենցաղավարման հմտությունների ուսուցանում, աշխատանքային թերապիա, արտթերապիա՝ շահառուի ցանկությամբ և այլն։
