Երկօրյա այցով Հայաստանում է ԱՀԿ եվրոպական տարածաշրջանային գրասենյակի տնօրեն դոկտոր Հանս Հենրի Պ. Կլյուգեն։ Այս մասին գրել է առողջապահության նախարար Անահիտ Ավանեսյանը։
«Առողջապահության նախարարությունում այսօր ընդունել եմ դոկտոր Կլյուգեին` հույս հայտնելով, որ նրա այցը Հայաստան նոր խթան կհանդիսանա մեր երկրի առողջապահական համակարգի և Առողջապահության համաշխարհային կազմակերպության միջև երկարատև գործընկերության համար:
Քննարկել ենք համավարակի հաղթահարման մեր փորձը, ինչպես նաև առողջապահության ոլորտում մեկնարկած հիմնարար բարեփոխումները` առողջապահական ծառայությունների համընդհանուր ծածկույթի ներդրում, առողջության առաջնային պահպանման օղակի, առողջապահական ծառայությունների որակի բարելավում, ծխախոտի դեմ պայքար, արտակարգ իրավիճակներին արձագանքելու պատրաստվածություն, հոգեկան առողջություն:
Անդրադարձել եմ 44-օրյա պատերազմի ողբերգական ու ավերիչ հետևանքներին, տեղահանվածների և գերիների հարցերին: Հանս Հենրի Պ. Կլյուգեն իր ցավակցությունն է հայտնել այս առնչությամբ:
Հանդիպման շրջանակներում ստորագրել ենք Հայաստանի և ԱՀԿ-մի միջև 2022-2023 թվականների Համագործակցության երկամյա համաձայնագիրը, որից հետո պատասխանել ենք լրատվամիջոցների ներկայացուցիչներին հետաքրքրող հարցերին։
Նշեմ, որ ԱՀԿ տարածաշրջանային ղեկավարի երկօրյա այցի շրջանակներում նախատեսված են բարձր մակարդակով մի շարք հանդիպումներ»,- գրել է Ավանեսյանը: